Addis Ababa:- Gumullanni hee’noonni badheessu yanna loosinni 52 kume hektaare ali baatto wixunni dimboonnita Wodiidi Sidaamu Zoone Gibrinnunna Baadiyyete Latishshi Biddishshi egensiisino.
Wodiidi Sidaamu zoonera badheessu looso hala’ladunni gumullanni qoqqowu qooxeessubba mereerinni mitte ikkase Biddishshu xawisino.
Biddishshu Sooreessi Kalaa Abebaayyehu Beyyene Itophiyu Pireesete uurrinsha ledo assino hasaawinni xawisanni; zoonete tayxe badheessu yanna loosinni xaphooma 52 kume 224 hektaare baatto addi addi wixinni diwate mixo amande loosu giddora e’noonniha ikkanna xaa yannara wo’munni wo’ma gumulloonnita buuxisino. Konninnino 6 miliyoone 1055 kuntaala ale laalcho gamba assate hende loonsanni hee’noonnita xawisino.
Biddishshu sooreessi xawishshi garinni; kageeshshi laalcho gamba assate dandiisanno gede roorenkanni loosidhe galtino daga yannaasincho tekinolooje horonsidhanno gede, dooramino sircho tuqisatenna loosidhe galtino dagara eeli geeshsha dirrine qajeelsha aatenni irkisate looso loonsoonni.
Zoonennihu diilallote akati lame danaati, Alichaamonna Worichaamoho yaannohu sooreessu; laalchimma luphi assate qooxeessu diilallote akati ledo sumuu yaannoha gidu dana kaansoonni. Ledoteno rosantinotanna yannaasincho gibrinnu hayyo horonsi’ratenni laalchonna laalchimma hattono islancho laalcho batinyunni afi’rate illachinshe loonsanni hee’noonnita kalaa Abebaayyehu huwachishino.
Dinnichu, Tumu, Kaaroote, Weesenna gummate laalonni Appile zoonete Alichaame qarqartora latinsannire ikkansa qummeessannohu kalaa Abebaayyehu; Worichaamu doolallote akati noo qarqartora roorenkanni Wahe, Badala, Bashanqu, Weese, Maxaaxeessunna Bohe qarunni laashshinannire ikkansa kulanno.
Laalchonna laalchimma lossate ogeeyyenna loosidhe galtino daga qinaabbe loossanno hayyo kalanqoonni yaannohu biddishshu sooreessi; baxxinohunni heeshshote oolto sagalete hasatto aana hekko kalaqqannokki gede loosidhe galtino daga wole yannanni aleenni albansa gibrinnu widira qoltanno geda assinoonni akati noota qummeessino.
Waacote shiqqo lainohunni xawisanni; Konni alba wixu sircho wole gobbate qoqqowubbanni abbinannita kayisannohu kalaa Abebaayyehu; tayxe dirinni kayinni sirchu qoqqowu giddo qixxaawanno gede assinoonnitanna konninnino sirchu shiqisho anje xaaddinokkita egensiisino. Ikkirono Tumu sirchi shiqqo anje noota kayise; latissanno maamarra latissanno gede assatenni Tumu sirchi shiqqo aana noo anje tira dandiinoonni, konninnino daga ikkado sircho afi’ra dandiitinota coyi’rino.
Jeefoteno sokkasinni; loosidhe galtino daga noonsa yannanna wolqa garunni horonsidhe hattono mittu mittunku mine baalanti maatete miilla irshu looso kaa’lante loossanno gede huwachishino.
Hattono yannaasincho gibrinnu tekinolooje horonsidhe laalchu afimalikkinni gamba assidhe garunni horonsidhanno gede, mini giddo horonsidhannohunni gatisse dikko fushshi`ratenni womaashsha garunni amaxxite horonsidhanno
gede sokkasi sayisino.
Qiddist Gezzaheny
Bakkalcho Onkoleessa 7, 2017 M.D
