Addis Ababa :- Cabbe Gaambeeltu woradi rosu borro mini rosaanote guma woyyeessate qoqqowu mootimma ledo halame loosanni afamannota Woradu Rosu borro mini xawisino.
Woradu Rosu borro mini qaru sooreessi kalaa Misraaqi Tesfaye Itophiyu pireeste uurrinshara xawisino garinni; woradaho rosaanote guma woyyeessate rosu minna ijaarshu loosinni kayinse kifilete uynanni roso uynanni hayyo lainohunni geeshsha illacha tunge loonsanni hee’noonnita xawisino.
Rosaanote guma woyyeessate rosu borro mini mittu ontu waaxxo kalanqe superivayizerootu, rosu mini murrootanna hajo la’annonsa bissa qoqqowu mootimma ledo haaro rosu budi garinni rosaanote guma woyyeessate loonsanni hee’noonnita coyi’rino.
Baxxinohunni, 6ki, 8ki hattono 12ki kifile rosaanora rosu guma woyyeessate mixi’ne loonsanni hee’noonnita Sooreessu qummeessino.
Qoqqowunna gobboomu fonqolo adhitanno rosaanora borrote mini rosu guma woyyeessate loosanni afamanno kulino.
Konni albaanni qoqqowunna gobboomu fonqolo adhitanno rosaanora guminsa aana leellanni keeshshino qarra tirate baalunkura qeechu noota Sooreessu egensiise; konni dirinnino qoqqowunna gobboomu fonqolo adhitanno rosaano woyyaawino guma abbitanno gede mixonsa garinni loonsanni hee’noonnita buuxisiisino.
Rosu loossa woyyeessate amandoonni mixo keenotenni gumulantanni noota lede xawisino.
Bizuneh Birhaanu
Bakkalcho Dotteessa 30, 2017 M.D
