Addis Ababa:- Daga Abbay kofattora leellishshinonte gede Baaru furcho afi’rate assinanni hee’noonni hixamanyerano hattoo kakkaooshshe leellisha nooseta Hundi Bareedda Maamari Pirezidaantichi Lij Daanieeli Jotte Mesfini coyi’ri.
Pirezidaantichu Lij Daanieel Jotte Mesfin 84ki hundi bareedda qeelle qaaggooshshu ayyaana kaima assatenni Itophiyu Pireesete Uurrinsha ledo noosi keeshshonni xawisino garinni; hundi bareedda mittimmatenni gobbate utuwimmara fulte qeelle afidhino. Wo’ma Itophiyu daga Abbay kofattono ijaartino.
Xa kayinni Abbay kofattora leellitino halamme keeraancho doogonni Baaru furcho afi’nanni gari aana hattonni leellisha hasiissanno.
Abbay kofatto xa noo deerrira iillitanno gede qocete ofoltino amuwi gattukkinni; mittu birrinni hanaffe fushshaato assatenni kofatto loosama dandiitinota qaagiisse; Baaru furchono Itophiyu tii’’i hajo ikkasenni halama hasiissannota qaagiissino.
‘’Baalu coyi ka’’annohu massagaanchuwiiniiti; massagaanchu qarooyye ikka hoogiro dagoomu qarooyye dikkanno; massagaanchu qarooyyenna ga’are seedise la’’annohanna masaalannoha ikkiro dagoomuno kaa’lanno’’ yiinohu Lij Daanieeli Jotte; Xaphoomu ministirchi; “jironke, loonsoommoha hirreemmonna hasi’nummoha eessi’neemmo Baaru furcho hooggunkero reyinoommo’’ yaasi qaagatenni; tenne hedo daga irkisse mootimmate waatira uurra hasiissannota huwachishino.
Mundee du’nantukkinni Baaru furcho afi’nanni doogo lainohunni mootimma hedose kaysaseno ikko keeraancho doogonni millimillo assase hasiissannotanna hiikkuno Itophiyu qansichinni irkisantannota ikkase leellishe; quchumunniti ikkito baaddiyyete daga Baaru furcho lainohunni anga noo bilbilinni Itophiyu Baaru furcho afi’ra qoossose ikkase macciishshiisha hasiissannota qummeessino.
Baaru furcho lainohunni jajjabbu calla ikkitukkinni oosono hajo hegersitanno gede; macca hallanyooti rosu minna geeshsha maratenni hajo lainohunni huwanyo kalaqa hasiissannonsata leellishino.
Woloota gobbuwanni uynanni dawaro lainohunni; macciishsha diinu ha’rinsho afate kaa’litannota qummeesse; daga coyi’nannita buuxxanni macciishshanna hasiissanno irko assa agarranninsata qaagiissino.
Itophiyu baalente yannara diinu nooseta ikase hawa dihasiissanno yiinohu hundi bareedda maamari pirezidaantichi; umikki diinnase qooxeessaho noo gobbuwa ikkansanni muli diiniwiinni qoropha woyyitanno yiino.
Demmellaash Demmeqe
Bakkalcho Dotteessa 30, 2017 M.D
