Addis Ababa:– 4Ki gobboomu dandoote heewo Addis Ababaho “Bilchaata buqee; dandootenni ikkadda qansoota” yaanno adawarshinni Dotteessa 27 kayse Onkoleessa 2, 2017M.D geeshsha harinsanni hee’noonni.
Heewotenna reqeccote bare faajjetenni hanafisiisinohu Layinki Xaphoomu ministirchi Temesgen Xiruneh tenne yannara coyi’ranni; “Noonke jiro garunni horoonsi’ne lophate dandoo hasiissanno” yiino.
Dandoo, kalaqo, ollonke hattono tekinoloje Itophiya harancho yanna giddo buximatenni fushshatenna hasi’noonni lopho widira reekkate dandiisiissannore ikkansa qummeessino.
Layinki Xaphoomu ministirchi yaatto garinni; tenne yanna bareende lamu gari akati noota ikka hasiissanno. Mitto ragaanni gobbanke utuwimma, wolambinatenna ayirrinye agarsiisa ikkanna; wole ragaanni kayinni buxima qeelatenni jireenya buuxisiisate. Albi annuwinke bareende guuta ikkitannohu xaa ilama lamu gari bareende noonsare ikkiturooti.
Tenne yanna ilama gobbate utuwimma agarsiisatenni ledote buximanna duumbara gatate rosicho qeelatenni Itophiya Afriku jireenyi lawishsha assate yawo tungoonninsa yiinohu Layinki Xaphoomu ministirchi; dandoo, kalaqo, ollonkenna tekinoloje Itophiya harancho yanna giddo lossate dandiisiissanno yiino.
Dandoote latishshi gobbanke lophonna jireenyira kaima ikkasi ammanatenni handaaraho illacha tunge loonsanni hee’noonnita qummeesse; sa’u soorrote dirra giddo loonsoonni loossanni kalaqotenni bilchaattino buqqee; ogimmatenni anga tidhitinore hattono dandootenni ikkadda qansoota kalaqa dandiinoonni yiino.
Itophiyu horrite daggino diinna irraawisse qoltino bareedda noosente gede techo kayinni ogimmatenna dandoote dhuka horoonsidhe gibrinnanke yannoonsitannori; Industirete lophora hasiissannori; daa’’attote handaara gumaamo assitannori hattono dijitaale hayyo lifixissanno ogeeyye noose yaanni coyi’rino.
Gobba noose jiro garunni horoonsi’ne latate dandoo hasiissannotanna mootimmano handaara lossate illachishshinota kule; Ministere loosu mini widoonni diru dirunkunni qixxaabbanno heewo kalaqotenna dandootenni ikkadda buqqeenna ogimmatenni tidhantino anguwa kalaqa dandiisiissinota ikkase lede coyi’rino.
Amsaalu Felleqe
Bakkalcho Dotteessa 30, 2017 M.D
