Tittiro
Gobba tekinolojetenna Industirete handaarinni lossate dandoo luphiima qeecha afidhino.
Handaarunni amandoonni timo guuta ikitanno gede hattono qansootu heeshsho woyyeessate dandiisiissanno daafira dagoomu giddo seekkine huwanyoote kalaqano agarranni.
Dandootenna ogimmatenni anga tidhitino qansooti uminsanni looso kalaqi’ra dandiitanno. Kalanqoonni loosirano qaxarante loosate hala’lado kaayyo noonsa.
Dandootenni ikkadda ikkitino qansootira xaa yannara gobbate giddo calla ikkikkinni Baara widono loosu kaayyo kalaqantanni no. Konninni, qansootu eonsano lossidhanni heeshshonsano woyyeessidhanni afantanno.
Baara widi loosu bobbahishshi ragaanni noo kaayyono garunni horoonsi’rateno qansootaho isilanchimma noo qajeelsha uynanni qixxeessanna bobbaasa agarranni.
Ledoteno, deerru deerrunkunni afantanno tekiniketenna ogimmate Kolleejjubbanna uurrinshubba dhuka lossa agarranni.
4ki gobboomu dandoote heewo Addis Ababaho harinsanni hee’noonni. Heewotenni ikkadda ogeeyye kalaqantanni noota kulloonni. Albillichono tekinolojetenni dandoo noonsa ogeeyye handaarunni xaaddannonsa xe’ne wonshi’ratenna ogimmate dandoo heedhannonsa gede dandiisiissanno qajeelshubba adhitanno gede assinanita xawinsoonni.
Heewisamaano noonsa dandoo hexxo uytannote. Gobbate gede xaaddinota dandoote xe’ne wonshi’ratenna taashshi’rate dandiisiissannote.
Dandootenni massagantannota loosu kaayyo adda assate worroonni ragi garinni gumula, Interpirayzootu Itophiyu loosu dikko mashalaqqe amanyooti garinni laalchonsanna owaantensa hirtanno. Dikkote xaadooshshi noosi loosu kaayyo kalaqo loossa gumula, babbaxxitino yannitte tekinolojubba qajeelsha aa, maatetenna dagoomu daddalu loossa halashsha albillicho gumulate raga worroonni hajubbaati.
Hajo laisse IFDR Loosunna Dandoote Ministircho dukko Muferihat Kaamil coyidhanni; Itophiyu dandoote latishshi ragaanni uurrinshunninna harancho yanna qajeelshubba aatenni, Interpirayzoota halashshatenni, kalaqote loossa halashshatenni handaara lossate Ministere loosu mini widoonni jawa illacha tunge loonsanni hee’noonni.
Itophiyu xaa yannara looso kalaqqannonna kalqoomu deerrinni heewisamaano ikka dandiitino wedella kalaqa dandiisiissannota kalaqote harinsho aana afantannotano hattonni.
Wedella dandootenni ikkadda assanna ogimmatenni anguwansa tidhitanno gede hasiisanno qajeelsha aatenni kalaqote loosi widira eessanna handaarunni tekinoloje halashshinanni Industirete widira reekkama dandiinannitano xawissino.
Loosu kaayyo wedellu afidhino eo barru hoshshora calla horoonsi’ratennino sae haaruudde loosu dandoo lossidhanni eonsanna heeshshonsa woyyeessidhannonna gobbate lophora noonsa yawono garunni fultanno gede assate yitino.
Gobbanniha duucha hanqafinonna kaajjado miinja ijaarate gibrinnunni, daa’’attote handaarinni, tekinolojete hattono wolootta lophote taqqanni qansootaho dandoo lossanna ikkadda assa agarrannitano hattonni.
Ministirchote xawishshi garinni; jiroo’mitino gobba ijaaratenna wedellu loosu kaayyo kalaqonna horonsi’raanchimma lossa agarranni.
Tini yanna kalqennihu loosu kaayyo kalaqo heewo hala’litinota ikkasenni wedellunniha kalaqote dhuka lossanna jawaachisha hasiissanno.
Layinki Xaphoomu ministirchi Temesgen Xiruneh isi widoonni; tenne yanna bareedda dandootenni ikkadda ikkitino qansootaati yiino.
Wedellunniha kalaqotenna dandoote dhuka lossatenn gobbanke Itophiyu gobbaydinni eessitannore babbaxxitino tekinolojubba gobbate giddo laashshatenni riqiwate loosa agarrannitano huwachishino.
Amsaalu Felleqe
Bakkalcho Dotteessa 30, 2017 M.D
