Hawaasa:– Badheessi yanna giwirinnu loosinni 57 kumi ali heektaare baatto addi addi wixinni dimboonnita Aliyye Zoone Irshunna Kalaqamu Jiro Latishshi Biddishshi egensiisi.
Konni loosinni 7.11 miliyoone kuntaala laalchono afi`rate mixo amandoonnita xawinsoonni.
Aliyye Sidaami Zoone Layinki Gashshaanchinna Irshunna Kalaqamu Jiro Latishshi Biddishshi Sooreessi Kalaa Aseffa Fona Itophiyu Pireesete Uurrinshara xawisanni; zoonete badheessi yanna giwirinnu loosinni 57 kume 911 heektaare ikkitanno baatto loonse addi addi wixinni diwa dandiinoonnita egensiisino.
Konninni, 7.11 miliyoone kuntaala laalchono afi’rate mixi’noonnitano coyi’rino.
Aliyye Sidaami zoone gede giwirinnu loosinni shoole qara ikkitino hajo aana illachiinshe loonsanni hee’noonnita qummeesse; kunino, dagoomunniha sagalete wowe buuxisate, dikko kaima assino laalcho laashshate, Industirete ikkanno laalcho shiqishatenna loosu kaayyo kalaqate ikkinota buuxisino.
Baattote aana dimboonni wixi giddo badala qara ikkitanna; 28 kume 85 heektaare aana diwa dandiinoonni; shoole woraddara 283 heektaare qasiisotenni 41 olluubbara badalate wixinni diwa dandiinoonnita Sooreessu Kalaa Asaffi coyi’rino.
Hattono, gammoojjaame qooxeessubbara wahe 592 heektaare baatto aana diwa dandiinoonni.
Dinnicha 6 kume 689 hektaare, waajjo tuma 1 kume 100 heektaare baatto aana; qoleno lame woraddra qasiisotenni 33 heektaare 25 olluubbara, weese 8 kume 644 heektaare baatto haarotenna horichaame baatto aana diwa dandiinoonni yiino.
Laalchonna laalchimma lossate ikkannoha bushshu harishsha, dooramino wixanna irshu keemikaale waacubbano shiqinshoonnita ledino.
Sooreessu xawishshi garinni; wolu illacha tunge loonsoonnihu Bunu latishshi aana ikkanna; zoonete 18 kumi heektaare baatto Bununni amadantino. Konni giddonni 10 kumi heektaare aana noohu laalcho aannoho.
Laalcho aannokki Bunano bande mukkinoonnitano buuxisino.
Haaro Bunu chigginye lainohunni 4.1 miliyoone qixxeessine 1 kume 620 heektaare baatto anna kaasate mixin’ne 1 kume 133 heektaare aana chigginye kaasa dandiinoonnita lede qummeessino.
Abrahaam Saamueel
Bakkalcho Dotteessa 30, 2017 M.D
