Sase kume sanna ale daga gutu ayimma amadde mittimmansa kaajjitinota ikkkitanno gede dandiissino amma`notenna budillaancho amanyootubba ilamatenni ilama tareessitanni kawa iillitino.
Itophiyu dagase baca budillaanchonna amma`note balchoommanni doyissantenna baxante mittimmatenni heedhanno baxillunna ayirrisamate lawishsha ikkitinota kullanni.
Qansootuno amma`nonsawiinni xorshantanno ayyaannate amanyootubbanni ijaarantino biiffanno ayimma uddi’ransannino aleenni; kaa`lamatenni sannate mitteenni hee’rate kaajjino balchooma beeqqitanno budenna Itophiyimmate kuula hattono xawishsha ikkinota kultanno. Tenne lamala giddono baxillunna kaa`lamate xawishsha ikkinoha kaote ayyaana ayirrinsanni.
Baalante Itophiyu kifilera kaote woy faasiiku albaanni noo lamalla giddo baxxitino ayyaame assootubba gumullanni. Tenne yannara hagiirre kalaqqanno macciishshamme mannu wodani giddo galtanno. Mayira yiniro Yesuus Kirstoosi shetto qeele reyootenni ka“ino yanna ikkitinohuraati.
Itophiyu ortodokisete amma`no widoonni jawa ayyaanaamete heeshsho xawishsha ikkinohu abiyi qoorre yanna saga`late amanyooti aanano jawa gede la`nanniho. Lame aganna geeshsha amma`note harunsaano saadate laalchiwiinni xeertiratenni maalinsa hagiirrenna hasattonsa agurte keeshshitanno; saadate laalcho calla ikkikkinni sagaleno 9 woy 11 saate geeshsha ittukkinni qoorte hossanno. Amma`note rosiishshi huwachishanno garinninna budinke xawisanno garinni barra wo`ma qoorreemmo yanna hashsha gamba assine saga`latenni kiisate dikkino; qarrantinore sagalsatenni ikkinnina. Kuni leellishannohu wolootaho aanna qarrantinore towaata umisenni hagiirru macciishshamme kalaqqannotaati. Konniraati tini lamala wodaninke giddo hagiirre kalaqqannohu.
Qullabbino lamala jeeffanno woytenna kaote barri soodanno woyte ayyaanaametenni calla ikkikkinni budillaancho ikkitubbannino qaanganni. Budillaancho doogonni qixxeessine ayirrinsanni woyte sagalete fooli duuchunku mine su`naanno. Kunino qoorrete goofimarchonna jilu yanna hanafase leellishanno. Tumu, buuru, barbarete fooli baalu kaote ayyaana qaagiissitannonke.
Itophiyu Kiristinnu amma`no ayyaani quqquxxotenninna budu assootubbanni dukkisaminoho. Ayyaannate qaaggo, maatete gambooshshinna osolu hattono addiha ikkitinoti lukkichu woxee fooli ayyaana iibbishshannoreeti.
Lukkichu woxee gobbaanni durishame maalinna buru maali wodana huntannoreeti. Budillaacho burbuxxo gafamino quuphenna korishamino buuro qixxeessinanni. Tini hedeweelcho taaltino sagale afiratenna saga`lateno kaa`litanno. Baxxinohunni Itophiyu kiristinnu amma`no harunsaano kao labbino budillaanchonna ayyaanaame qixxaawubba aana baalunku qansichira sagalete wowenna tuqishsha buuxisate mootimmate yawo uyinanninsa bissa baqqeenyunni halama noonsa. Korkaatuno ayyaanu yesuus kiristoosi manchu beettira noosi baxille leellishatenna reyootenni gatisate umosi sayise uynona. Kunino ninke wolootaho baxillenke kaa`lamatenninna irkisamatenni xawisa hasiissanno leellishannonke.
Baalunku Itophiyu kifillara faasiiku albaanni noo lamalla giddo baxxino garinni ayyaanaamenna wolootta qixxaawo assinanni keeshshinanni. Kuni ayyaani wodanu giddo kalaqannoti hagiirru macciishshamme bayirate. Korkaatuno yesuus kirsitoosi cubbu reyoo qeele ayirrinyunni ka`i`ino yanna qaaggooti.
Amandoonni dotteessu agani giddo kiristinnu amma`no harunsaano widoonni ayirrinsannihu kaote ayyaani jawa bayicho uynanniho. Tenne lamalanni baalante kiristinnu amma`no harunsaano ragaanni ayirrinsannihu kaote ayyaani gobbate ayirrisantanno amma`notenna budillaano amanyootubba giddonni mittoho.
Ayyaanu amma`nonniha calla ikkikkinni; Itophiyimmate budillaancho balchoomma iibbadu garinni xawinsanniho. Kuni ayyaani akatisinni mittu barrira calla ayirrinsannihano dikkino; mitte lamala geeshsha babbaxxitino amma`notenna budu amanyootubbanni iibbadu garinni ayirrisamanno.
Itophiyunniti amma`note ayyaanna batinyunni budillaancho amanyootubba ledo luphiimu xaadooshshi noonsa. Saga`late, uddirate, kaa`lamate, ayiddimmate mittimmanna baxillu amma`note ayyaanna ledo kaajjino xaadooshshi noosi.
Konni kaiminni tenne lamala giddo kiristinnu amma`no harunsaanonni ayirrisamannohu Yesuus Kiristoosi kao woy “Faasiiku ayyaani” ledo xaaddanno haammata budillaano amanyootubba no. Baxxinohunni kuni ayyaani iillasira albaanni balaxxe amma`note harunsaano barraho iibbadu garinni gumullanni amanyootira assitanno qixxaawo Itophiyu dagara budillaancho biinfillenna iibbille kalaqqannote.
Tenne yannara dikkote amanyooti sagalete, budillaancho agattote qixxaawo uddi`ratenna labbino qixxaawubba ledo qinaabbe ayyaanu biinfille calla ikkikkinni sannate ilama tareessanni dayno budillaancho balchooma ikkino jirooti. Konne calla ikkikkinni mittimmanna baxillu baxxino garinni darga afidhenna hiittenne yannannino baxxino garinni luphi yite leeltannohu Faasiika woy kao labbino ayyaanna yannaraati. Amma`note harunsaano ikka hooggurono mitteenni heeratenni olliimmatenni kalaqqino mittimmanna kaa`lamate xawishshi gotti yee fulannohuno Faasiika labbino ayyaanna ayirrinsanni yannaraati.
Tayixe Yesuusi biilinke kaote ayyaani Dotteessa 12ni hosanno. Dotteessa 12 qeellete barra ikke gobboomu deerrinni ayirranno barraatino. Kaote ayyaani Kiristinnu amma’no rosiissanno garinni manchi beetti cubbira Masiqalu aana lubbosi sayise uyino mootichanna biilo hattono xagicho ikkino Yesuusi biilinke reyoo qeele kaote ayyaaninni kaino barra qaagate ayirrinsanni barraati. Kuni barri qeelletenna kaote ayyaanaati. Qeelle heedhannohu shettonna cinca heedhurooti.
Yesuusi mootichinkeno manchi beetto woxxate tenne kalqe qarra lae shettote masiqala duqqe loosinokki cubbinni ninke cubbaataammaho sutame kayinnilla madaarrisihunni sayikki barra manchu kayisara dandaannokki kincho gongo’mishe kaino.
Kuni barri Yesuusinna manchi beetti mereero hajajama hoogatenni kalaqamino babbadamooshshu danqara araarunni gundoonniho. Manchi beetti balaxxino hundi hunonna cubbi Mootichu Yesuusinni woxxamatenni diiganteenna haaro heeshsho, kaote qullaawi ayyaaninni hegere heeshsho uddi’rinonna gordu kaayyo afi’rino haa’ru barri safooti kuni barri.
Kuni xawadu barri daara Yesuusi tunsichoho jifamino, mishamino, he`minoonnisi. “Ateneeto qolle atera he’minihero hakku kaokki barraati”. Ee; Yesuusi waamma diige kai yannara qachaho gunguntanni Yesuusiranni qolte isire isiranni he’mitino bissa noonkanni. Hatti he’ma kaote malaateeti. Gobbankerano xa giddo hee’ne meessinni kayinsanni bushiinshanni su’mi Itophiyu qeellera malaateho.
Yesuusi tenne kalqera daye shetto lainohu cubbisinni dikkino. Tenne kalqe aana noo shettonna qarra hiittoonni sa’nannironna qeellanniro, mimmito hiitto ikkine baxama ayirrisamanna kaa’lama noonkero rosiisatenni lawishsha ikkateeti.
Mootichu yesuusi sai basera baala lawishshunni rosiisanni sainota amma’note massagaano qullaawa maxaafa naqqaashe assatenni rosiissanno. Hooginohura aa, kallinoha uddisiisa, usuraminoha xa’manna heeshshi yine mimmito ayirrisammanni hee’ra loosunni leellishino. Kunino techo ninkera budenke ikke sufino.
Ninkeno, jironkeno, loosinkeno Maganunnireeti. Konnira, amma’nonkenni bikkammeemmohu wolootta kaa’latenni irkisatenninna baxille leellishatenniiti.
Konnira ayyaana ayirrinseemmo woyte calla ikkikkinni hiittenne yannarano ikkiro hiittenne amma’no harunsaano Kaaliiqi hajajo gumulatenna lawishshasi assootunni leellishate rosichi kaajje sufa hasiissanno. Noosihu hooginohura aa hasiissanno. Qarru giddo noori daafira huuccanna shettonsa beeqqa hasiissanno. Xissantinore ikko usurantinore xa’ma ayyaanaamittete calla ikkikkinni mannihimmate gadachooti.
Dhuku noonsakkire towaatano hattonni Maganu albaanni jawa waaga afisiissanno. Yesuusi biilinke maalasinna mundeesi aatenni woxxinonke. Ninke kayinni isi cincanni cinca, isi sutamanninna shetanni xawaabba afi’noommo. Konni daafira Itophiyu daga Yesuus Kiristoos assootunni leellishinonke baxille mimmitoho leellisha hasiissanno.
Abbebech Maatewoos
Bakkalcho Dotteessa 9, 2017 M.D Hamuse
