Hawaasa:– Quchumaho loonsanni hee’noonnihu koriderete latishshira quchumu teessaano beeqqo luphiimate yiino Hawaasi quchumi gashshooti kantiiwi Mekuriya Mershaye.
Kantiiwu Mekuriya Mershaye Itophiyu pireesete uurrinshara xawisino garinni; quchumaho umikki doyichonni umiki gafinni Membonni-Riferaalete geeshsha 2.2 kiilomeetire doogo latisatenni Xaphoomu ministirchi Abiy Ahimed (Dr) noowa maassiinse owaantete fano assinoonni.
Tenne doogo latinsi yannara 500 ale ikkitanno qansootira yannate geeshshi loosu kaayyo kalanqoonnita kule; xaa yannarano latinsoonni doogo co’isatenna agarooshshe assitannori 200 qansootira uurrinshunni loosu kaayyo kalanqoonnita qummeessino.
Kantiiwu xawishshi garinni; umikki doyicho layinki gafinni 12km ale diwannoha koriderete latishsha xaa yannara loonsanni hee’noonni. Tini kolishsho doogo ikkitanna; guranna qiniiteenni sette kaameella mitte yannanni saysa dandiitanno hala’lado doogooti.
Konni loosinnino xaa yannara 600 ale ikkitanno qansootira yannate geeshshinna uurrinshunni loosu kaayyo kalaqantinota qummeesse;doogote loosi goofanno yannarano haammatu qansootira uurrinshunni loosu kaayyo kalaqate hende latinsanni hee’noonnita kulino.
Quchumaho konni dirinni calla 4 biliyoone birra baajeette hasidhanno koriderete latishshi loossa harinsanni hee’noonnitano egensiisino.
Koriderete latishshinni doogga calla ikkikkinni Hawaasi Garbi qooxeessa agarooshshe assatenna latisateno xaa yannara addi addi latishshi diizayne loonsanni hee’noonnita kaysino.
Konninni, Kolishshu wayinni Amoora Gedelinna Taaboori Ilaali geeshsha Garbu qacce latisate dandiinanni diizayne loonsoonniha ikkanna; looso hanafisiisate qixxaawo assinanni hee’noonnita kantiiwu coyi’rino.
Noota kalaqamu jiro garunni latinse dagooma horaameeyye assateno quchumu gashshooti illachunni loosanni afamannota egensiisino.
Umikki doychonni lamu gafinni 14 kiilomeetire ale hala’lado doogo latinsi yannara mittu teessaanchino koriderete korkaatinni qaesinni kainokkita qummeessinohu kantiiwu Mekuriya; konnirano korkaatu, quchumu kaimunni yannitte pilaanenni massagamannoha ikkasinniiti yiino.
Tini yanna quchummate kaote yannaati yiinohu Kantiiwu; quchummate latishshanna lopho buuxisiisate dagooma annimmatenni beeqqisiisa hasiissannota huwachishino.
Xaa yannara quchumaho harinsanni hee’noonni koriderete latishshira dagoomu jawa beeqqo assatenni agarranninsa dilaala fulanni afamannota lede xawisino.
Amsaalu Felleqe
Bakkalcho Badheessa 25, 2017 M.D
