Addis Ababa:- Badheessa 24, Itophiyu daga dimokiraasetenna miinju xa’mubbara dawaro qolinohanna Abbayi kofattora kayinni kao lallawinoho yanni Jireenyu paarte Sidaamu qoqqowi sinu borro mini sooreessi Kalaa Abrahaam Maarshaallo coyi’ri.
Kalaa Abrahaami Itophiyu pireesete uurrinsha ledo assino keeshshonni; Badheessa 24, 2010M.D gobboomu deerrinni daggino soorro Itophiyu daga taalleenya buuxisiissinotanna gutunni latatenna dimokiraasete xa’mubbara dawaro qoltinote yiino.
Sidaamu daga umise umose gashshatenna poletikunna latate xa’mo dawaro afidhanno gede soorrote albaanni sa’u seeda yannara keeraancho doogonni sharro assitanni keeshshsitinota kayse; soorrote gashshootinni jawa kaayyo afidhinota qummeessino.
Soorrote albaanni,taalleenya buuxisiisate, afoonna bude garunni lossi’ratenna Itophiyimmanna roduuwimma kaajjishi’rate hasattonni xa’mo kayissino manni usurantanninna hekko kalanqannansa jawa waaga baattanni keeshshiturono; dimokiraasete, halaalaancho farconna danchu gashshootinna latate xa’mubba duucha yannara ka’anni keeshshitu gedensaanni Badheessa 24, 2010M.D gobboomu deerrinni daggino soorronni Sidaamu dagano seeda yanna xa’mora dawaro afidhino yiino.
Gobboomu deerrinni tini soorro dagganno gede wo’manti Itophiyu daga gutunni sharramatenni jawa waaga baattino yiinohu Kalaa Abrahaami; sharro dawaro afidheenna gobbate keeru gei yannara, Sidaamu daga seeda yanna xa’mo dawaro afi’ra dandiitinota qummeessino.
Badheessa 24,2010M.D daggino soorro Itophiyu daga dimokiraasete xa’mora dawaro qoltinota ikkitanna; Sidaamu dagara kayinni baxxino garinni erote qeelle afisiissinote yiino.
Kalaa Abrahaami xawishshi garinni; soorro Sidaamu dagara dhaggete qeelle abbitinota ikkasenni; tenne yannarano roduuwa Itophiyu daganni ledo taalo latatenna gutunni lophate sharro assitanni afantanno.
Latishshunna dimokiraasete xa’mubba dawaro afi’rasenni xaa yannara qoqqowoho keeru geino; daa’’attotenna latishshu mereersha ikkatenni wolootta qoqqowubbbarano dancha lawishsha ikka dandiino yiino.
Sa’u seeda sanna gashshoottara Itophiyu daga caabbichu, gorsunna woloottano addi addi doogganni horaameeyye assate gashshaano Abbayi Laga koffe horoonsi’rate hasattonna mixo heedhunsarono; poletikunna miinju gumulate dhuki hoogasinni hanafisiisa didandiitino.
Soorrote albaanni noo gashshootinni Abbayi Lagi kofo hanafisiinsoonniha ikkirono; babbaxxitino korkaattanni ijaarshu gufi’re keeshshinoha soorrote gashshooti wirro hanafisiisatenna xaa yannara ijaarshu loosi jeefote gafira iillasi Badheessa 24 Itophiyu qansootira baxxitino kaayyonna uminsa dhukinni gumulate wolqa kalaqinoho yiino.
Badheessa 24, Itophiyu daga dimokiraasete xa’mubbara dawaro qolinoho; Abbayi kofattora kayinni kao lallawinoho yee; gobbankeno dimokiraasetenna miinjunni gotti yite leeltanno gede assinoha ikkasi coyi’rino.
Gobbate daggino soorro Itophiyu daga baalanti gutunni sharrante abbitinota ikkasenni gutunni daggino soorronni afi’noonni kaayyubbanni horaameeyye ikkateno mittimmatenni ikkine loosi’ranna gobboomu mittimma kaajjisha hasiissannotano lede huwachishino.
Amsaalu Felleqe
Bakkalcho Badheessa 25, 2017 M.D
