Addi Ababa: Itophiyu duumu baarinna Hindete wuqiyaanoosera noose maaritayim agarooshshe shiqotenni harunsitanni noota gobbayidi hajo ministirchi Ambasaader Taayye AtsiqeSillaase egensiisino. Nayili halammete hanqafo sumuumme dhagete loosise fooliishshowa higge sa’ara shiqqinotano qummi assino.
Gobbayidi hajo ministirchi Ambaambaasaadder Taayye AtsiqeSillaase 79ki halantino mootimma uurrinsha xaphoomu songo Niyu- Yorkete quchumira harinsanna assino hasaawinni; Itophiyu duumu baarinna Hindete wuqiyaanoosera noose maaritayim agarooshshi dadilli addintanni huluullisanoseta xawisino.
120 miliyoone ali daga noosetinna maaritayim daddalo horonsidhannoti Itophiyu wuqiyaanoossate nooseta maaritayim agarooshshe shiqqe harunsitanni noota xawise; kipho, baaru aani diinimmanna wolootu wodhote gobbaanni ikkitino asso qoxeessaho nooha maaritayim agarooshshe jifote aana tugginota kulino.
Itophiyu maaritayim gargarooshshi agarooshshi loossa baalanka beeqqisiissinota ikkitanno gede hasidhanno yiinohu Ambaasaader Taayye; baaru waalcho hasatenna horonsi’rate hasattose ayirrisantanno gede coyi’rino.
Itophiyu Somaale Laandi ledo e’ino sheemaati qoxeessu gobbuwa ledo mitteenni lophanna lata kaima assino garinni ikkinota qummi assanni; Itophiyu oliicho gobbuwa ledo halamatenni loosate rosichi nooseta coyi’rino.
Itophiyu Afriku buudi cancishaanchimma olamatenni keerenna adawa buuxisiisate loossanni leellitannota xawise; Somaalete cancishaanchimmate gaamo ikkinoha Alshabaabi dhuka lowo garinni daafursate widoonni wolootu gobbuwa keeru agarsiisaano wolqubba ledo gumaamo looso loossinota kulino.
Somaalete cancishaanchimma olamatenni afantino wolapho huluullote aana tugganno hajubba shiima yanna gedensoonni leellitanni dagginota leellishe; kalqete daga Somaalete afantino wolapho qole abbatenni qooxeessu keerenna adawa huluullote aana tugganno asso uurrissara hasiissannota egensiisino.
Ambasaader Taayye, Itophiyu Somaalete keerira baattino aamammenna waagira Somaale Itophiyaho afansha uyitaseranna ayirrissasera hasiisanota xawise; Itophiyu qooxeessu keerinna ga’labbo ledo xaadinohunni shiqqannose ku’laatora huluullo horontanni diadhitanno; cancishamaanchimma olamate hoolannoseri mitturichino dino yiino.
Itophiyu kalqete keerinna adawi buuxisamara qoleno gummaame duucha daga halamaancho barera hixamanyite loossanno yiinohu Ambasaader Taayye; Afriku halantino mootimma uurrinsha giddo ha’nura riqiwaanchimma afi’ra hasiissannoseta xawisino.
Kalqoomu fayinaansete amanyooti aana kaajjado woyyeesso assatenni lophate aana leellitanno gobbuwa taalo fayinaansete shiqqo afidhanno gede hajo la’annonsari baalu qeechansa fula hasiissannonsata huwachishino.
Wole widoonni Nayili Halammete Hanqafo sumuumme dhagete loosi fooliishshowa higge sa’’ate shiqqinota xawise; kunino wayi gobbuwa taalloonyinna korkaatunni waa horonsi’nanni gari nooha assanno yiino.
Itophiyunniti Bayira Abbay Kofo caabbichu/ elektirikete dhuka burqisa hanafinotanna kunino Itophiyunnitanna olluu gobbuwata caabbichu dhuki hasatto qolatenni qoxeessu halamme luphi assate seyoo assannota xawisino.
Itophiyu ayyarete soorro gargadhate xaphoomu ministirchi Abiy Ahimed (D/r) hanafantino haanja muro looso ontu diri yanna giddo 40 biliyoone chigginye kaasamase qummi asse; haanja muro Itophiyaho dubbu amado jawu garinni lossitinotano xawisino.
Itophiyu diilallote soorro gargadhate assitanno loossara Kalqete daga hasiissanno kaa’lo assitanno gede woshshatto assino.
Bakkalcho Wocawaaro 23, 2017 M.D Hamuse
