Addis Ababa:– Irreechu ayyaani dagate xaadooshshe kaajjishatenna gobbate giddo turizime halashshate injaanno akata kalaqannota Addis Ababu quchumi gashshooti egensiisi.
Quchumu woga, seesimurgotenna turizimete biiro sooreette Hiiruut Kaasawu (D/r) bero
odeessaanote uyitino xawishshinni xawissino garinni; Irreechu ayyaani dagate xaadooshshe kaajjishatenna gobbate giddo turizime halashshate injaanno akata kalaqanno.
Itophiyu xawu ayyaanna batinye budubbanninna babbaxxitino dagoommanni afantinoreeti yitinoti sooreette; ayyaanna Itophiyu daga mittimmatenninna gutunni gamba yite heedhanno gede assitanno tuuqqaati yitino.
Oromote daganni iibbadu garinni ayirrinsannihu Irreechu Itophiyu xawu ayyaanna mereerinni mitto ikkinota xawisse; ayyaanu mittimma, irkisamatenna baxillu balchoomma dudumbanniha ikkinota coyidhino.
Ayyaanu quchumaho haammata beeqqaano afantinowa ayirrisamannoha ikkasinni dagate xaadooshshe kaajjishate kaa`lannota buuxisse; Irreechu Addis Ababaho jawa elto noosi ayyaana ikkasi coyidhino.
Irreecha labbinori xawu ayyaanna qole gobbate giddo turizime halashshate luphiimu qeechi noonsata xawisatenni; baxxinohunnino gobbate giddo turizime bude kalaqate jawa safo noonsata buuxissino.
UNESCO te angatenni amammandannikki dona ikke borreessamanno gede loonsanni hee`noonnitano sooreette xawissino.
Addis Ababu quchumi kantiiwi borro mini pirees sekiretariyate sooreessi Mieessa Elema (D/r) isi widoonni; Irreechu mannu mannu ledo hattono kalaqamu ledo keere dirrisannonna keeru daafira dudumbanni ayyaanaati.
Tayxe Irreechu ayyaani Addis Ababu quchumi koriiderete latishshinninna wirro latisate loossanni biifenna seese noo yannara ayirrinsanniha ikkasinni baxxinoha assanno yinohu sooreessu; quchumaho ontunku furchora wosinna adhate qixxaawo jeefinsoonni yino.
Ayyaanaho quchumu deerrinni babbaxxitino qixxaawo assinoonnita buuxise; Irreechu egzibiishiine, foreme lede ayyaanu balchoomasi agare danchu garinni ayirrisamanno gede hasiissanno qixxaawo baala assinoonnita xawisino.
2017 M.D Irreechu ayyaani “Irreecha budinke haaroonshira” yaanno massagote qaalinni wocawaaro 25nni Hore Finfinnenna 26nni Hore Arsedde ayirrinsannita xawinsoonniti qaangannite.
Abbebech Maatewoos
Bakkalcho Wocawaaro 23, 2017 M.D Hamuse
