Itophiyu 20 diri woroti biheeraawe gaamo Afriku boowe seekaafu zoone filote heewo assasera albaanni qaranna kaa`laano qajeelshaano mootoo`mitinota Itophiyu lekkate kuwaase federeeshiine tenne lamala giddo faajje assitino. Konni garinnino Siyyum Kennede wedellu gaamo qara qajeelshaancho ikkatenni mootoo`minoha ikkanna Abiy Kaasahuninna Amsaalu Ismelealem layinki qajeelshaanchimmanni mootoo`mitino.
Qidduus Giyorgiisi wedellu gaamo qajeelshaancho ikkatenni qajeelshaanchimmate heeshsho hanafinohu Siyyumi qara Itophiyu biheeraawe gaamo giddono layinki qajeelshaancho ikke owaatino. Bacu rosichi noonsa qajeelshaano giddonni mitto ikkanna, Itophiyu 31 dirra gedensaanni Afriku boowera sa`anna qajeelshaanchu Sewunnet Bishawuha kaa`laancho ikkatenni owaatino. Kilawetennino jawu deerrinni loosa dandiinoha ikkanna Faasiil Kenema, Mechaalinna Sidaamu buna qajeelsha dandiino.
Qajeelshaanote mootoo`ma harunse qajeelshaanchu Siyyum 38 godo`laasinera woshshatto assinoha ikkanna; maakisanyote barrinni hanafe Kaaleebi hoteelera gamba yaatenni filote heewora qixxaawonsa hanaffino.
Qajeelshaanchu Siyyumi baalunku xawu kifillara haammata godo`laasinera umi woshshatto assinoha ikkanna yannate geeshsha onte eote agaraasine gaamosi giddo hanqafino. Abiyu Kaasaye Dirredaawu quchuminni, Amaanueel Desta Itophiyu daddalu baankenni, Taammiraat Qibaatu mechaalinni, Indaashshawu Urga Itophiyu buninninna Abinet Habite Wolayitta dichinni eote agaraanchimmanni doorantino. Abdulsemed Yesuuf, Kirubeel Daanye, Israeel Semayaat, Diladdis Gebire, Fitsum Fitihiaallewu, Waanca Tuut, Biniyaam Beqqele, Biruk Taarreqeny, Abbebe Sheno, Yoonaas Leggesenna Temesgen Taaddese mereeri kolbitaano ikkite hanqafama dandiitino.
Mereeriminna qeddaanote kifilennino baca godo`laasine yannate geeshsha amadantanna Mikiyaas Tseggaye, Miraaj Sefa, Yaareed Biruk, Zhaaviir Mulu, Aniwaar Bediru, Melaaku Ayyele, Qaaleaab Felleqe, Yuhaannis Mengistu, Mikiyaas Badaaso, Tewodiroos Baantenna Selemoon Gemmechu mereerimi kifilenni hanqafantinoreeti. Cherinnet Mengiste, Tsegga Kedir, Abinnet Abbayineh, Yeaabsira Tesfaye, Yoonaataan Eeliyaas, Daagim Awweqe, Dawiit Yuhaannis, Anteneh Teferra, Heenook Ermiyaas, Habitaamu Gullilaatinna Miliyoon Hayile qeeddaanote kifilenni hanqafantinore wedella godo`laasine ikkitino.
Tanzaaniyu qixxeessaanchimmanni harinsanni 20 diri woro Afriku boowe seekaafu zoone filote heewo aana beeqqitannoti Itophiyu 20 diri woro labballu biheeraawe gaamo honse zoonete gobbuwa beeqqissanno filote heewonni zoone riqibbe Afriku boowe beeqqitanno lame gobbuwanni mitto ikkate sharrantanno.
Soojjaatinna mereerimi Afriku lekkate kuwaase maamarra amaale mini (Seekaafa) filote gaamishsha sa`u lamalara Daareselaamete faajje assinoti qaangannite.
Afriku 20 diri woro boowe filo lee zoonnara bande harinsanniha ikkanna 48 gobbuwa beeqqitannota Afriku lekkate kuwaase konfedereeshiine (KAF) egensiissino. Seekaafu zoone filote heewo lamu gaamishshinni gaamme harinsanniha ikkanna honse gobbuwa boowete sa“ate heewisantanno. Itophiyu gaamishshu lamunni Yugaanda, Wodiidi Suudaanenna Burundi ledo gaamante heewose gumultanno. Seekaafu zoone filonni gaamishshu mittunni Tanzaaniyu, Ruwaandu, Suudaane, Jibutinna Keeniyu gaamantino. Filote heewo birru agani e“anno woyte Tanzaaniyu qixxeessaanchimmanni gumullihu gedensaanni zoone riqibbe beeqqitannore lame gobbuwa bandanni.
25ki Afriku 20 diri woro boowe heewo A.K 2025 arfaasu aganira Wodiidi Afriki qixxeessaanchimmanni harinsanniha ikkanna 12 gobbuwano beeqqitanno. Afriku 20 diri woro boowenni beeqqitannorinna boco jeefishsha e`anno gobbuwa Chiili qixxeessitanno kalqete 20 diri woro boowera suwashshu garinni sa`anno.
Abbebech Maatewoos
Bakkalcho Wocawaaro 9, 2017 M.D
