Addis Ababa:- Doogimaroho ayirrinsanni ayyaanna daa”ataano goshooshatenni miinju lophora jawa horo noonsa. Lawishshu gederano Masiqalu Damarinna Irreechu ayyaanna amma’notenna dagoomite horonsannino aleenni Diyaasporootunna batinyu gobbate giddiidinna gobbayidi daa’’ataano beeqqo assitannori gobbate jirooti; kuri ayyaanna.
Ayyaanna jirtensa agarantino garinni ayirrisamansanninna dagankeha dagoomitte xaadooshshe kaajjishatenni mootimmate gede hanafantinoti jawaachishshanno loossa rodiimma kaajjishshanno gede assitino.
Ayyaannannihu amma’note, dagoomitete, hattono miinju horo gobboomu mootimma kaajjishshira umisi widiidi qeecha fulanno gede hananfoommohu haaruu dirinni xaaddote mittimma kaajja noose.
Addis Ababu Quchumi Gashshooti Keerunna Ga’labbote Biiro Masqalu Damarinna Irreechu ayyaanna keerunninna hagiirrunni ayirrisate assinanni he’noonni balaxote qixxaawo hajo la’annonsa bissa ledo keentino.
Biirote sooreette dukko Liidiya Girma gambooshshu giddo assinoonni hasaawinni coyidhino garinni; Masqalu Damarinna Irreechu ayyaanna amma’notenna budu hornyansa agarantino garinni keerunni ayirrisantanno gede adawu bissanna hajo la’annonsa bissa hasiissannota balaxote qixxaawo assitanni noota xawissino.
Baalanti base bidhattotenni raabbe keeraancho ikkitanno gede mittimmate loosi kaajja hasiissannosi yitannoti dukko Liidiya; baalunku hajo la’annonsa bissa ayyaanna mittimmatenninna xabbe ayirrisantanno gede qeechansa fula hasiissannonsata huwachishshino.
Ayyaanu rodiimmatenninna mittimmatenni xawe ayirranno gede adawu uurrinshi bilookete geeshsha leellitanno ga’labbote bissanna baalunku dagoomi ledo gamba yee loosate ikkado qixxaawo assitanni leellitannota quchumu sinnawiinni buunxoonnitano ledde xawissino.
Demmellaash Demmeqe
Bakkalcho Wocawaaro 9, 2017 M.D
