Addis Ababa:- Itophiyu turizimete saatelayte akkawunte (maareekko) daa”ataanote lifixanna maareekkantino tajubba iillishate dandiisiissannota Turizimete ministere egensiissu.
Turizimete ministircho Ambaasaadder Naasiise Caali Itophiyu turizimete saatelayte akkawunte hanafisiisate bare aana xawissino garinni; Itophiyu dhaggete, kalaqamunna budu daa”attubba iillo noosete. Noose jiro daa”ataanote garunni egensiisate turizimenete saatelayte akkawunte latinsoonni.
Mootimma gobba nooseha turistete gawalo bayichubba latisatenni handaara lossate loossanni no yitinoti ambaasaaddercho Naasiise; konnirano Itophiyu turizimete saatelayte akkawunte amanyooti latasi mitto lawishshaati yitino.
Itophiyu turizimete saatelayte akkawunte faajje ikka handaarunni noota maareekkantino tajete ruukkimma tiratenni daa“ataanote lifixa owaante aa dandiissannota ikkase egensiissino.
Saatelaytete akkawunte gobba giddora mageeshshi daa“ataano daggannoro, mageeshsha keeshshitannoro, miinjunni mageeshshi geeshsha duntannoro, turizime gobbate xaphooma gobboomu laalchira mageeshsh geeshsha baraassannoro, turizimete taje amadooshshe yannoonsate, turizime wolootta handaarra ledo noose xaadooshshe afatenna wolootta haammata horubba afisiissannota huwachishshino.
Itophiyu nooseha cibbamino turizimete dhuka lossa hoogasenni handaarunni afira hasiissannose horo afidhukkinni keeshshase kayisse; xaa yannara soorrote mootimma handaaraho jawa illacha aatenni turizime lossate loossanni no yitino.
Turizime gobbate miinjitte lophora, gobbaydi soorroranna loosu kaayyo kalaqo lophora qara ikkasenni gobbate babbaxxitino qooxeessubbara afantannota turizimete iillote bayichubba latisate loosi kaajje sufannota buuxissino.
Itophiyu istatikise owaante qaru dayirekiterchi Beher Shaale (D.r) isi widoonni; Itophiyu nooseta cibbantino kalaqamu jirubba, budenna balchoommase qinaabbino doogonni owaantete aana hosiisa dandiitukkinni keeshshase xawisino.
Xaa yannara gobbate umiha ikkitinoti turizimete saatelayte akkawunte latte loosu giddora ease turizimete handaara lossitannota buuxisatenni; qinaabbinonna sufatto noose turizimete istatikise taje amadatenni lifixa tajete du`namme heedhanno gede dandiissanno yino.
Pilaanetenna latishshu ministir dieeti kalaa Bereket Fissihatsiyoon isi widoonni; mootimma Itophiyunnita cibbantino eltubba badde latisatenninna hornya ledatenni miinju lopho buuxisiisate illachunni loossanni noota coyi`rino.
Turizimete handaari loosu kaayyo kalaqoranna gobbayidi soorro afirate jawa kaa`lo assannota xawise; turizimete saatelayte akkawunte faajje ikka qole handaaru gobbate miinjitte lophora baraasanno qeecha roore lossanno yino.
Gaazeexu Odeessaanchinni
Bakkalcho Wocawaaro 9, 2017 M.D
