Addis Ababa:- Itophiyu diilallote akati soorronna qooxeessu hajubba lainohunni gumultanni noo loossa lainohunni 10ki Afriku qooxeessu ministirooti addi songo beeqqaanora lawishshase beekkinota Pilaanete Latishshu ministere egensiissu.
Ministerete qooxeessunna diilallote gadi soorro sumimmenna halamme loosu gumulsiisaanchi kalaa Mensur Desse uyno xawishshinni; Itophiyu diilallote gadi soorronna qooxeessu hajubba lainohunni gumultanni noo loossa 10ki Afriku qooxeessu ministirooti addi songora egensiissino.
Konninni, haammatu beeqqaano Itophiyu gumultanni noo loossa naadde gobbanke ledo halante loosate hasattonsa leellishshino yiino.
Itophiyu massagganni afantannohu Afriku qooxeessu ministirooti 10ki addi songo Itophiyu massagaanchimmate qeechase garunni fultanni nooha ikkasi kule; addi songonni Abijaani xawishsha kaajjisha lede shoole gumulo sayinsoonni. Baattote mulluugamanna moolle gargarate halammetenni loosa hasiissannota songote duu’ne torbinoonni hajooti.
Qara songora qoteho wolootta amaaleno harinsoonnita qummeesse; bare, Itophiyu gobboomu, Ahiguretenna kalqoomu deerrinni qooxeessunna diilallote gadi soorro lainohunni noose qeecha agarsiisidhinoha ikkasino xawisino.
Abijaani xawishshi; babbaxxitino gumulo amaddino sanade, baattote mulluugama gargarate, moolle gargarate, Afriku diilallote akati soorro illachunni loossa hasiissanno qara qara sokko lainohunni sanade kaajjinshoonni.
Afriku diilallote gadi soorro, duucha lubbuwa, moolle gargaratenna pilaastike iillishshanno gawajjo lainohunni yekkeerantanno gaamo Afriku huuro mittimmatenni macciishshiishate Ahigurete horo agarsiissanno gede; gumulonsano aantanno 20ki Afriku qooxeessu ministirooti songora shiqishshanno gede raga worroonnita qummeessino.
Addi songonni iillinoonni gumulo yannate songote pirezidaantitte ikkitinoti Itophiyu widoonni Afriku komishiinera shiqishatenni Afriku massagaano kaajjishshanno gede xa’minoonnitano xawisino.
10ki Afriku qooxeessu ministirooti addi songo Awuropu kiiro Woxawaajje 30-Wocawaaro 6/2024 Kotidivoaarete Abijaani harinsoonniti qaanganite.
Amsaalu Felleqe
Bakkalcho Wocawaaro 9, 2017 M.D
