Paariisi 2024 paaralimpiike godo`lubbanni Itophiyu atileetooti maala`lissanno dhegge borreessiisa suffino. Sa“u qidaamete hashsha atileeticho Tigist Gezaheny Paaralimpikete illetenni siima hiima la“a dandiitannokkiri gaamishshi (T 13) 1500 meetire heewo 4:22:39 jeefisatenni lame aantaano yannara culku medaaliya borreessiissinoti qaangannite. Sanyote barra qole atileet Yaayyesh Geete Paaralimpiketenni Itophiyaho layinkiha culku medaaliya kalqete kibirewesenenni dukkisante borreessiissino.
Atileeticho Yaayyesh Geete Paaralimpikete heewonni dodisaanchose Kindu Siisayi ledo ikkatenni 1500 meetire illetenni wo`munni wo`ma la“a dandiitannokkiri (T11) heewonni qeelaancho ikkatenni dhagge borreessiissino. Atileeticho heewotenni culka lukasenni gobbaanni konni alba umisenni amandoonnita xeertinyu kibirewesene woyyeessase ledote dhagge ikkitino. Kunino Paarisi paarilimpikenni Tigist Gezahenyitenni aanchite Itophiyaho layinkiha culku medaaliya borreessiissinota ikkite dhaggete maareekko aana ofoltanno gede assinose.
Atileeticho umiha paaralimpikete qeellese gumultu yannara xeertinye 4:27:68 ikkitino saatenni umisenni amadante noota kalqete kibirewesene 4 lipheessinni woyyeessa dandiitinoha ikkanna; 2024 Jaappaan Koobe kalqete paaralimpike atileetiikise shampiyoone aana 1500 meetirenni illetenni wo`munni wo`ma la“a dandiitannokkiri gaamishshinni heewose assite 4:31:77 dodatenni xeertinyunniha kalqete kibirewese hiiqatenni qeelaancho ikkitinoti qaangannite.
Muli dirra kawa Itophiyu paaralimpike millimillo giddo maala`lisanno guminni dukkisantanni afantanno atileetooti mereero mitte Yaayyesh Geetete. Atileeticho Yaayyeshi wodiidi Gonderete zoone Debiretaaboori quchumira ilantinoha ikkanna dirise 27ho. Ilantino olliira rosu mini giddooti doda hanaffinohu. Debiretaaboori quchumira paaralimpikete atileetiikise pirojekite hundaanni hanqafante qajeelshubba adha hanaffunkunni dirra kiirantino.
Itophiyu paaralimpike shampiyoone aana gumaame ikkase harunse biheeraawe gaamotenni hanqafamate kaayyo afidhinoti Yaayyeshi; umita kalqoomu heewo assitino 2020 Tunizete aanaatinkanni. Konninnino 200 meetirenna 400 meetirenni lame culku medaaliya lukkino. 400 meetirenni Tookiyo 2020 paaralimpike minima wonshatenni gaamote giddo hanqafante qajeelsha adhitanni keeshshitinoha ikkirono kalqoomu paarlimpike komite seenneho uytino mitte beeqqote beehachinni atileet Yaayyeshi qidaamete barra culka lukkino atileeticho Tigist Gezahenyite ledo heewisante Tigistinni qeelamasenni paaralimpikete godo`lubba aana beeqqate kaayyo afidhukkinni gattino. Paaralimpikete beeqqate halchose adda assate sa`uta sase dirra dodisaanchose ikkinohu Kindu Siisayihu ledo ikkatenni mereerimi xeertinyira fiildese soorratenni jawaatte loossino.
Konni dirinni Dubayete aana illetenni wo`munni wo`ma la`annokkiri gaamishshi T11 1500 meetire heewonni culku medaaliyi qeelaancho ikkitanna kalqete shampiyonera beeqqisannose saateno borreessiisa dandiitino. 2024 Jaappaan Koobe kalqete paaralimpikete atileetiikise shampiyoone aana 1500 meetire wo`munni wo`ma illetenni la`annokkiri gaamishshi heewo assite 4:31:77 dodatenni xeertinyunniha kalqete rikerde hiiqqatenni culka lukkino. Kunino Paariisi tikkeete mursiisinose. Atileet Yaayyesh Geete umi paaralimpikete beeqqosenni filote heewo maala`lissanno ikkadimmanni umita ikkite jeefisatenniiti gumultinohu. Sanyote barra goofimarchu heewonni qeeltanno yine hendanni atileetootinni baxxinohunnino Tookiyo 2020 xeertinyu culku medaaliyi ayidde ikkitinota Mekisikonniti Roodriigeez Saaveediranna Tookiyo aana birru medaaliya hattono Koobe kalqoomu shampiyoonenni nehasete medaaliyi ayidde ikkitinota wodiidi Afrikita Koitizi Loozaani lede qeelte kalqete kibireweseneno umiseha assite sane tareessitanno dhagge loosa dandiitino.
Abbebech Maatewoos
Bakkalcho Woxawaajje 30, 2016 M.D
