Addis Ababa:- Ministere dipiloomaasete loosi ledotenni dagoomitte yawubba fulate illachunni loossanni noota Gobbayidi hajo ministirchi ambaasaadder Taayye Atsiqesillaase xawisi.
Uurrinsha haaro diro korkaata assatenni lossitanno 33 qaaqquulliranna hoffayidi eo noonsa loosaasinera ayyaanu baraarshanna hurbaate beehate amuraate gumultino.
Gobbayidi hajo ministirchi ambaasaadder Taayye Atsiqesillaase; Ministere dipilomaasete loosi ledotenni dagoomitte owaantubba aana illachunni loossanni afantanno yiino. Kunino dipilomaasenke mannihimmate loossa aana safantinota ikkase leellishannoho yiino.
Gobbate gede dagoomu qarrubba tirate gumulamanni afamanno loosinni ministerete loosu mini yawosi fulate wo`naalsha assate aana afamannota buuxise; konninnino qinaawino hawadi mannihimmate dagoomittete owaante kakkaooshshe mixiratenni 2016M.D dancha fajjo amuraate hanafinota egensiisino.
Ministerete xawishshi garinni; uurrinsha anga ajjinori mine haaroonsatenna hurbaate beehate loossa gumultino. Ledoteno Arbaamincetenna Wolayitta Sooddote quchummara irko hasidhanno 400 ali rosaanora rosu uduunni irkonna anga ajjinori shoole maatera deerrasi agarino minu ijaarsha hanafisiisate looso gumultino.
Uurrinsha 33 qaaqquullira wo`ma yawo adhite lossate aana afantanno. Qaaqquulle lossanna irkisa ninkera jawa elto ikkasenni kaayyaataamimmate gede adhineemmo yiinohu Ministirchu; kunino, uurrinsha dagoomu hobbaatira noose murciraanchimma xawisatennino sa`e Itophiyu daga mittimmanna shooshanqe leellishannoha ikkino mittimmatenna ledamate haruma xawisannoho yiino.
Irko assinanninsa qaaqquulli hobbaati suwashshu garinni xaadannohanna Itophiyunniha albillichote kaayyo mixirate illachi noosiha ikkasi Ministirchu buuxisino.
Dancha fajjote loossa aana beeqqa qansichimmate gadacho ikkitinota ambaasaadderchu Taayye buuxise; uurrinshate loosaasine gumultanni nooha danchummate looso kaajjishshe suffanno gede woshshatto shiqishino.
Amuraatunni gobbayidi hajo miistirchi ambaasaadder Taayye Atsiqesillaase ledo ministir dieetootu, koyisamaano uurrinshuwa massagaanonna loosaasine afantino.
Abbebech Maatewoos
Bakkalcho Wocawaaro 2, 2017 M.D
