Addis Ababa:- Sidaamu qoqqowi pirezidaantichi Desta Ledamo 2017 haaro diru soorro ayyaana laise hawalle iillishi’ne yitanno sokkasi saysino.
Sokkasinnino; haaru dirinni qansootu baalunku mittimmanke kaajjishi’ne; keerenke agadhine; wo’ma dhukankenna yannanke latishshahonna lophote hosiinse hattono xawaabba hexxo amande gobbanke jireenya sufisiinseemmo diro ikkonke yiino.
Ninke Itophiyu qansooti gutu ajuujanna hornya noonkereeti; kunino gobbanke duuchu handaarinni lophitenna jiroo’mite buximatenni fulteenna la’’a ikkanna; soorrote mootimma konne adda assate loossanni afantanno yiino.
Ajuujanke adda ikkitanni noota leellishannori soorrote mootimmanni maareekkantinoti haammata qeelle no. kuri latishshu qeellenke maareekkisiisa dandiinoommohuno baca qarrubba giddoonni sa’neeti.
Xaaddinonke hekkono haxonke heeshshi diassitinonke; roorenkanni kaajjishshinonkella yiinohu Pirezidaantichu; qarrubbatenni qeelammummokkinni haammata pirojekitubbano yinoonni yannanna isilanchimmatenni ijaarre gumulatenni dagoomaho owaante uytanno gede assa dandiinoonnita kaysino.
Bayiriidi haaroo’mate kofatto ijaarsha gudatenni caabbichu wolqa burqisanno widira reekkate iillinoonni. Hurbaate gobbatenna woloottano daa”attote Industire handaarinni haammata iillote baychubba halashshatenna latisate loossa gumullanni hee’noonni.
Qamadete laalcho yannitte hayyonni diru giddo saseenge laashshatenni loosidhe galtinori horonsi’raanchimma lossatennino sa’ne laalcho gobbara soya hananfoonni.
Quchummate lopho buuxisiisate ragaannino aantanno ilamara sa”anno haruma woratenni quchumma deerransa amaddinonna biiffinota assa dandiinanni hee’noonni.
Gobbanke lophitino gobbuwanni ledo taashshate gobboomu latishshu woyyeesso assine haammata soorro maareekkisiisa dandiinoommo.
Aantanno yannara Investimentete handaarano woyyino deerrinni sufisiisatenna miinju dhukanke lossi’rate kaa’lannonke gede; uurrinshubba sokkonsa garunni fultanno garinni safote latishshuwa ijaarsha halashshate; Gibrinnu miinja woyyeessatenna loosidhe galtinore irkisatenni sagaletenni meessaneete dandaate; hattono asalu hekko shotisate gobbaydi dikkuwara sonkanni laalchubba bikka lossatenni gobboomu miinjanke lossi’rate mixonke garunni loosu aana hosiinseemmo.
Amadisiiseno, gobbasi baxanno qansichi baalunku, daddalaano, loosidhe galtinori, dureeyye, loosaasinenna hajo la’annonsari gobboomu miinju poolise gummaame ikkitanno gede ammanamatenninna hixamanyite mootimmate waatira ikkite loossanno gede huwachishino.
Hananfoommori lophote taqqanna latishshu mixonke jireenyu widira massaggannonkete. Gobboomitte micconke, egennonke, hayyonkenna hornyybbanke garunni horoonsi’ne halamme loosatenni gobbanke jireenyu widira reekkino yiino.
Wirro haaru dirira hawalle iillishinke yiinohu Pirezidaantichu; diru duuchu handaari mixonke garunni gumulleemmonna hagiirrunniha hattono mimmitu ledo halammeemmonna kaa’lammeemmoha ikkannonke gede halcheemmo yiino.
Gaazeexu Odeessaanchinni
Bakkalcho Wocawaaro 2, 2017 M.D
