Paariis olompiike aana 10 kume meetire birru meedaaliyi qeelaanchi atileet Berihu Aregaawi Itophiyunnita 3 kumi meetire kibirewesene angasira eessino.
2024 dayimendete liige heewo sa“i sambatu barra 12ki iillo quchuma ikkitino Polaandete chorzowu quchumira Seleesiyaani xawira harinsanna wedellichu atileetichi Berihu Aregaawihu 3 kume meetire heewonni layinkiha ikke jeefisino. Seedu xeertinyinni haammata Itophiyu beeddahe beeqqitino heewonni Berihu umiha ikke jeefisa hoogirono layinkiha ikke jeefisi yannara borreessiisino 7:21:28 saate Itophiyunnita kibirewesene adha dandiisiissinosi. Saateno xeertinyunni kalqete sayikki rakkino saate ikkiteno borreessantino.
Maala`lissanno heewo leeltino heewonni Norweezhunnihu 5 kumi meetire olompiiketenna kalqete champiyoonenni Jaakoob Ingbriigisten 3 kumi meetire kalqete kibirewesene hiiqqino. Jaakoob 7:17:55 ikkitino saatenni kibirewesene woyyeessanna; A.K 1996 dhaggete Keeniyu atileetichi Briiyaan Daanieel Koomen 7:20: 67 amandeenna 28 dirra keeshshitino kibirewesene angara dhino. Konnirano layinkiha ikke jeefisinohu wedellichu Itophiyu atileetichi Berihu heewo umihunni kayise ollahisatenni leellishinohu maala`lisanno dhuki kaa`linosinkanni.
Paariis 2024 olompiike gedensaanni haammata Itophiyu atileetooti beeqqitino tenne dayimendete liige heewonni qeeltanno yine agarroonni atileetooti gumaa`mitukkinni gattino. 3 kume meetirenni yannannihu kalaqenkera umi deerri aana ofollinohu Yoomiif Qejelcha 7:28:44 ikkitino saatenni sayikkiha ikke jeefisinoha ikkanna; xeertinyunni umi yannara heewisaminohu wolu Itophiyu atileetichi Xilahun Hayile 7:30:97 ikkitino saatenni shoolki deerra amadatenni jeefisino. Tookiyo 2020 olompiike 10 kume meetire qeelaanchi atileet Selemoon Baaregga 7:32:49 ikkitino saatenni lamalki deerra amade jeefisino.
Polaandete Chorzowu quchumira Seleesiyani xawira babbaxxitino heewubbanni kalqete kibirewesenubbanna rakkino saate borreessantino hashsha quqquxxamatenni agarroonnihu seennu 1500 meetire heewo Itophiyu atileetooti aliidimmanni jeefisantino.
Itophiyunniti wedellichonna jawa hexxo tungoonniti atileeticho Dirribe Welteji 1500 meetire heewonni qeelaancho ikkitino. Wedellicho atileetitte xeertinye 3:57:08 ikkitino saatenni jeefisa dandiitino. Dirribe Paaris olompiike gedensaanni sa`u lamalara Siwiizerlaand Luzaanete dayimendete liigenni 3000 meetire beeqqite heewote kibirewesene lede hiiqqatenni qeelase qaangannite. Kunino dayimendete liigenni shoole barrubba gedensaanni lame babbaxxitino xeertinyubbanni coommado qeelle coommishidhanno gede dandiisinose.
Wole Itophiyu atileeticho Fireweyini Hayiluti Paariis olompiike yannara maala`lisanno dhuki aana heedhenni beeqqa hoogase gaabbo gedensaanni dayimendete liigenni maala`lissanno heewo assite 3:57:88 ikkitino saatenni layinki deerra amadde jeefissinoha ikkanna; Ingiliizenniti Beeli Jiyorjiya 3:58:11 ikkitino saatenni e“atenni sayikkita ikkite jeefissino.
Lawino garinni quqquxxamatenni agarroonnihu labballu 3000 meetire gufichu heewonni Morokonnihu olompiiketenna kalqete champiyoone xeertinyu qeelaanchi Soofiyaan Elbakaali qeelino. Elbakaali Paariis olompiike xeertinyu qeelle gedensaanni tenne dayimendete liigenni kaajjado heewo xaaddusirono keeniyunnihu Amoosi Sereemi ledo taalo ikkitino saate (8:04:29) jeefise fotote finiishenni qeelaanchimmasi buuxantara dandiitino.
Paariisete olompiikenni xeertinyunniha culku medaaliya qeelate boode gatte heedheennasi gufichu sarraaqeennasi uwinohu xeertinyunni kalqete kibirewesene ayiddi Lemmeecha Girma dayimendete liigenni dibeeqqino. Tenne hoowonni umihunni kayise qeeltanno yine hendoonniri wolootta Itophiyu atileetootino qeela didandiitino. Saamueel Firewu 3ki, Saamueel Duguma 8kiha hattono Geetinnet Waale 11kiha ikkite heewonsa jeefissinoha ikkanna Abrihaam Sime qole agure fulino.
Abbebech Maatewoos
Bakkalcho Woxawaajje 23, 2016 M.D
