Hawaasa:- Qoqqowoho tayxe dirinni calla ijaarroonniri xalalu anganni way uurrinshuwa 360 kume ale daga horaameeyye assitinota Sidaamu qoqqowi Way Shiilotenna Wolqate Biiro egensiissu.
Biirote sooreessi Kebbede Ganoole (Injiiner) xawisino garinni; qoqqowoho gumulamihu 2016 baajeettete dirinni calla 360 kume daga horaameeyye assitinota xalala anganni way uurrinshuwa ijaarreenna horo aa hanaffino.
Sidaamu qoqqowunni tantanami yannara xalalu angani way iillo xibbuunni 38% calla ikinota qaagiissinohu Sooreessu; xaa yannara kayinni xalalu anganni way iillo erotenni lossa dandiinoonnita kaysino.
Konninni, tayxe lede sa’u shoole dirrara xalalu anganni way iillo 38.2% noowinni 60% widira lossinoonni yiino.
Xalalu anganni way iillo halashshate jawa illacha tunge loonsanni hee’noonnitano hattonni.
Tayxe lede sa’u shooole dirra giddo qoqqowoho 875 ikkitannota mereerima, manaaddanna shiimmaadda xalalu anganni way uurrinshuwa ijaarreenna dagoomaho horo uytanni nootano qummeessino.
Xaa geeshshano 38 jajjabba pirojekitubba ijaarsha hananfoonniri giddonni xaa yannara 28 pirojekitubba ijaarshi gumulameenna horo uytanni noota huwachishino.
38 pirojekitubba mitte mittente ijaarshira 376 kuminni 25 miliyoone birri geeshsha woxu fulo xa’mitannoha ikkanna; xaphoomunni kuri pirojekitubbara 2 biliyoone ikkanno birra gaamme ijaarranni hee’noonnita kulino.
Kuri pirojekitubbara gaammoonnihu 2 biliyone birri giddonni xaa geeshsha 1.3 biliyoone birra fulo assinoonniha ikkanna; gatinoha pirojekitubbate ijaarshi loosi wo’munni wo’ma gumulama geeshsha baantanniha ikkasino xawisino.
Qoqqowoho hananfoonniri 38 jajjabba xalala anganni way pirojekitubba mereerinni xaa yannara 28 ikkitannori ijaarshi gumulameenna horo uytanni nooha ikkanna; wolootta manaadda pirojekitubbanni ledo xaphoomunni 650 kume 840 ale dagoomu bissa horaameeyye ikkansano lede buuxisino.
Amsaalu Felleqe
Bakkalcho Woxawaajje 2, 2016 M.D
