Qiddist Gezaheny
Amandoonni bejetete dirinni quchumunni xaphooma 6.4 Miliyoone birri ali eo gamba assate mixo amande loonsanni hee’noonni yino Alatta wondi quchumi eote biilloonyi sinu borro mini.
Sinu borro mini sooreessi kalaa Aklilu Shunehu tayixe diri giwire gamba assate harinsho lainohunni Bakkalcho Gaazeexi ledo assino hasaawinni; 2013 Bejetete dirinni quchumaho babbaxxino deerrira noo giwiru baatanowiinni xaphooma 6.4 Miliyoone birri ali e’’o gamba assate mixo amandoonnita xawise; konne gumulsateno Maaja Mittunni hananfe loosu giddora e’noonni yino.
Quchumaho deerra A,B nna C yine bandoonni giwiru baataanowiinni giwire gamba assate loosi sufe afamannoha ikkanna ; Kalaa Aklilu xaawishshi garinni quchumaho deerra A yine bandoonniri 75 giwiru baataano, deera B ra 37 baataanonna deerra C ra 1180 giwiru baataano ikkansa kule, konni garinni roore anga giwiru baataano hanafote aana noore ikkansanni gamba assate amandoonni mixo ajjara dandiitinota huwachishinno.
Konni garinni deerra C giwiru baataano Maaja 1-10 2013 M.D geeshsha noo barrubba giddo baattinoha ikkanna konni deerrira noo giwiru baataanowiinni 3.1 Miliyoone ali eo gamba assate hende 3.7 Miliyoone ale gamba assa dandiinoonnita xawisinohu sooreessu konninnino hendoonnihu aleenni gumulsa dandiinoonni yino.
Hattono deerra B giwiru baataanowiinni Maaja 30 2013 M.D geeshsha gamba assinanniha ikkanna 417 kumi ali birra gamba assate hendoonnita hattono deerra A giwiru baataano 2014 M.D Birra agani goofimarchi geeshsha baattannotanna insawiinni 2.2 Miliyoone ali e’’o gamba assate hendoonnita sinu borro mini sooreessi kalaa Aklilu lede xawisino.
Tayixe eo gamba assate harinsho sai diri ledo heewisiinsanni woyte luphiimu badooshshi nootanna 2012 M.Dnni koroonu vayirese taraawo ledo amadaminohunni quchumu eo aana luphi yino qarri xaade sainota kayisinohu kalaa Aklilu , konninni harunsine quchumunniri giwiru baataano albiwiinni 20-25 anga geeshsha ajishshe baattanno gede assineenna hakko garinni baatansanni sai diro quchumu eo lowo geeshsha dirritinota coyi’rino.
Tayixe giwire albi garinni gamba assinanni hee’noonniha ikkasinni hafanfarrenna mooru nookkiha gamba assinoonni woxe garunni latishshu aana hosiisa hasiissannonke. Togo assiniro dagate baatate kakkaooshshino lexxanni ha’rannota sooreessu lede huwachishinno.
Konnira giwiru baataano tungoonninsa giwire ammanamatenni mootimmate baatatenni quchumu lophoranna latishshaho iminsa beeqqo assanna qansichimmate qeechano fula hasiissannonsa yaanni kalaa Aklilu sokkasi sayisino.
Bakkalcho Maaja 15/2013 M.D
