Wocawaaru agani rosu hanafanno agana ikkasinni rosu ajandubba haammattanno. Baxxinohunni, konni dirinni qole uminna layinki dirimi rosi minna, hattono Yuniversitete roso calla dikkino ajanda ikkinohu. Layinki digire maasterse rosino konni dirinni wocawaaru agani ajanda ikkino. Konnirano korkaatu, Rosu ministere fushshitino rosu biddissi garinni layinki digire rosi gobboomu deerrinni ikkasinniiti. Konni albaanni Yuniversitubba uminsa fushshitino yanna garinni fonqoltanni rosiissanno harinsho konni dirinni hanafe Rosu ministere widoonni ikkino. Konni kaiminnino tenne lamala giddo uyinoonni.
Tenne giddo kayinni mittu wodanchinoonnikki coy no. Kunino, ogimmate rosooti. Ogimmanniha yinanni woyte qole rosantinota xagisote, maandisimmannita… labbino jawa illacha uyinoonnisare yaa`ya dikkino. Angate ogimmate roso ikkitinoriraati illacha uyinoonnikkihu. Gadetenni tekiniikenna ogimmate yinanni woshshinannita yaate. Tekiniiketenna ogimmate giddo no yinanni ha`nura ikkitino angate ogimmara illacha uyinoonninsaha dilawanno. Korkaatuno, tekiniiketenna ogimmate rosi kifilla giddo bushshu loosi, mini giddo horonsi`nanni uduunnichi loosi, budillaancho uduunnubba loonsanni hayyo daafira kullanna dimacciishshinanni.
Mitte gobba qajeellenna lophote xawishshi Industire ikkanni dayinkunni barru keeshshino. Jajjabba Industirra kaimi qole angate ogimma ikkitinota deama dinonke. Tini ha`nura agimmate loossa jajjabba rosu uurrinshuwa deerrinni illacha afidhuro yannaasinchote widira lophitanno kaayyo hala`ladote.
Mannu loosu hajora mittu qooxeessinni wole qooxeessa ha`ranno woyte hakko qooxeessinni budillaancho uduunnubba hidhanno. Mito mito woyte yannaasine faafriku uduunnubbanni roore baxissannonna hasi`nanniti budu uduunnubba no. Kuni uduunnichi loosamannohu budillaancho doogonniiti. Konne uduunnicho loossino mannooti yannaasincho roso rossinokkireeti. Loosanno mannino la’’amannohu ogeessu gede ikkikkinni hundi/qajeelinokki manni gedeeti. Tenne ogeeyyenni roore gobbasira mitto coyeno cophi assinokkiha digire calla duqqino mancho ayirrinsanni.
Itophiyaho leellanno halaali leellishannohu “Rosino” yinanni qansichinni roore yannaasincho roso rosinokkihu Industirete waacora shiqanno. Lawishshaho; giwirinnu owaantera hasanno uduunnichi xaano budillaancho doogonni qixxaawannoho. Rosino yinannihu kayinni yannaasincho Irshu uduunne gatamara nafa didandiino. Horonsi`nannitino gobbaydinni einoreeti.
Loosu korkatinni millinsanni baadiyyete qooxeessubbara baca angate ogimma loossa afantanno. Rossino yinanniti dagoomu kifilla konne uduunnicho hidhitanno; insa kayinni konne uduunnicho yannaasincho doogonni laashsha dandiisiissanno dandoo woy ogimma dinonsa. Elektirooniikesete uduunne calla ikkikkinni mini giddo horonsi`nanni uduunnichi baalu gobbaydi gobbuwanni daannoho. Yannoo`manna qajeelle bikkinannihuno waajjuullu laashshitino uduunne hidhatenniiti. Wole widoonni, qole gobbate giddo loosamino uduunnicho hidhanna horonsira yannoo`ma hoogate xawishshi gede assine la`nanni.
Addaho mite mite budillaancho uduunnubba kaajjillunnino ikko owaantete rankenni waajjuullu laashshitinohu woroonniiti. Ikkollana, rosu budi giddo eessine illacha uyninsaro yannoo`mate kaayyo heedhannonsa. Angate ogimmara illacha uyineemmero lophanni harannonkanni. Budillaancho uduunne loosanno manni umisi yanna yannatenni woyyeessanni haranno. Konni daafira tekinoloojetenni irkinsironna illacha uyniro lophanno yaate.
Konni albaanni “Angate ogimma looso” yinanni rosu dani noonkanni. Ikkirono kayinni, ikkado illacha diuynoonnisinkanni; rosaano dandiitannota angate ogimma looso haadhe abbitanno gede assinanni. Mitu mitu giwirinnu uduunne, mitu mitu olu bagado, mitu mitu mini giddo horonsi`nanni uduunne loosanno. Jeefoteno, kiirote bixxille afi’rate calla ikke gatanno. Rosaanono hattenne ogimmanni sufate hasatto dinonsa; korkaatuno, hattenne ogimma jawa ogimma gede kiirantannota dikkitino. Kuni qarri xaa geeshsha sufinohura xaano angate ogimma rosu giddo illacha diafidhino.
Angate ogimma mittu rosu dani gede la’’ama noose; sayinsete kalaqo gede la’’ama hasiissannose. Rosu amanyooti giddo gaamama noonsa. Tenne ogimmanni lophino mannino wolootaho leellishanna rosiisa noonsa yee ammaneemma. Angate ogimmanni busultino rosaanono jawaachisha hasiissanno. Konne assinanni woyte ogimmano ayirrinye afidhanno; tenne ogimma rosiisidhanno rosaanono kalaqantanno. Loosu hoongi qarrino shotanni ha`ranno yaate. Angate ogimma gumma sayinsete kaima ikkitannohura illacha uyinonsa!
Abbebech Maatewoos
Bakkalcho Birra 1, 2016 M.D
