Addis Ababa: Mamanna maa assa heedhannonkero anfummorono ola uurrisate qaafonke kayinni qaallate olano hanqaffannohura lowore coy’ratenni ruxxi yinoommo yaatenni qarqartote olanto dagate xaadooshshi dayrektere Koloneeli Geetinneti Adaanehu xawisi.
Gargartote olanto dagate xaadooshshi dayrektere Koloneeli Geetinneti Adaanehu Addis Zemenira xawisino garinni, mitu mitu kaphaasine affinokki coy ola uurrisate qaafo kilaashetenninna medifetenni calla ikkinokkitaati. Ninke qaalla ollolamantee ledooti ola uurrinsoommohu.
Tenne baala dana soorrantino mashalaqe gugattonni anfoommo geeshsha anfoommo; mamootenna maa assa heedhannonkerono seekkine anfoommo yiinohu Koloneeli Geetinnet, gargartote olanto hajajo iillitannose yannara hasiissanno qaafo baala adhate dandiitanno uurrinsha aana afantannoha ikkinohura kalqete tuqu xaadooshshubba baala fincitanno kaphinni dihembeelleemmo.
Fushshinoommo lallawi ledo xaadannokki looso loosa hoogate yine kayinni lowo coye coy’ratenni ruxxi yinoommo yiino.
Koloneeli Geetinneti xawishshi gede, olanto mama maa assa heedhannoseronna hiittoo qaafo adha heedhannosero affinona kaphu mashalaqqe fincantu kiiro tumo qola hasiissannota di-ikkitino yitanno uurrinsha amandoonni. Xa kayinni ola uurrinse hee’noonniwa konne qansoommo, konne amandoommo yitanno kaphu mashalaqqe fincamase dana di-ikkitinona hegersine la’a hasiissanno.
Kaphu mashalaqqubba fincanturono kayinni insa poropogaandi deerrinni lowo danchummanke leellisha agarranninke yiinohu dagate xaadooshshi dayrekiterichi, qarrubba lexxitannoha ikkiro kayinni mangittete muro harunsite heedhanno qaafo heedhara dandiitannota xawisino.
Mangitte hedate yanna guma la’e qarru iibbabbanni dayro ola uurrisate lallawano kayissara dandiitanno. Hattee yannara wo’ma wolqankenni ka’nummoro qaalunnino ikko bagadunni assineemmo oli hee’rara dandaanno yiino.
Xa noo akatinni HWHTni iillitanni leeltano kisubba hee’rase buuxisiisinohu Koloneeli Geetinneti, gargartote deerrinni kayinni hajubbate aana lowore yaate dihasiissanno. Olantono iillara dandaanno qarra gargarate dandiissiissanno qixxaawo aana no. Jeneraali Baaca Debelehu yiino gedeno, wirro Meqele amada hasiissanno yitanno muro heedhuro olantote qarrissanno hajo di-ikkino yiino.
Addisu Adoola
Bakkalcho Maaja 8, 2013 M.D
