Addis Ababa: Juntu Amaaru Qoqqowiranna qarqaraho iillishanni noo gawajjo Itophiyu aana kaysino gawajjo ikkitinohura mittimma mikinteemmo yaatenni Sidaamu Qoqqowi wedelli xawissu.
Wedellu cancishaancho HWHT giggili tenne lamala Amaaru Qoqqowiranna mitu mitu qarqarira loosanni noo cancu looso lainohunni Bakkalcho gaazeexira xawissino garinni, “cancishaancho HWHT illachi qansoota bebbeehatenni gobba diigate” yitino.
Konni aana Hawaasi Quchumi teessaanchi wedellichu Sambato Baqqalihu coy’rino gede, cancishaancho HWHT Junti Amaaru Qoqqowiranna qarqaraho iillishanni noo gawajjo mittu qoqqowi hajo calla ikkikkinni baalanka la’’annoho yaatenni coy’rino.
Wedellichu Sambato ledoteno, cancishaancho HWHT uynoonnise hedate yanna dancha hedeweelcho gede horonsi’ratenni gobbate keere hembeelsitanni keeraano qansoota barshetenni shitanni afantannohura ninke wedellu yanna uynummokkinni gobbate golamino qarra mittimma mikintammora hasiissanno yiino.
Shabbadiini woradinni wolu hede uynohu wedellichu Abbebe Hobehu isi widoonni, gobbate wolambinate ayirrisiisa annuwinkewiinni ragi’noommo bareende ikkinnina argetenni afi’noommota di-ikkitino yaatenni xawise; cancishaancho HWHT gaamo keereho diriirtino Itophiyu anga ga’matenni keeraano qansooti aana barshete looso loossanni afantanno yiino. Ikkinohurano tenne hunaanchonna dagatenna gobbate eltannokki cancishaancho mittimma mikitate yanna xaati yaatenni coy’rino.
Cancishaancho HWHT gaamo kaphu kalaqinni gobba diigatenninna gobbaydi wolqubbaranna diinnara sayisse uytara hedde loossanni noohura giddooyidi mittimma kaajjishatenni hunote sharrese kachafisiisa agarranninke yaatennino xawisino.
Gobbanke heera sufisiisatenna seeru aliidimma ayirrisiisate mangitte adhitanno hiitteeno qaafubba golo ikkatenni agarranninke qansichimmatenna gobbate yawo fula doorshu nookki hajo ikkitinotano coy’rinohu wedellichu Abbebe; Konnirano hasiissanno kakkalo baala baatate qixxaawinoha ikkinotano lede xawisino.
Horraanchonna cancishaancho HWHT gaamo xa baxxeewo garinni Amaaru Qoqqowi aana goltino qarra harinshotenni wole qoqqowubbarano kalaqara dandaannokki akati dino; konnirano Konne cancishaancho Junta mittimma mikita noonke yiinohu wole hedo uynohu wedellichu Asinaaqe Ayyeleho.
Wedellichu Asinaaqe amadisiiseno, Juuntu xaa yannara loosaanni noo cancu loosi gobbate gede golaminonke qarra ikkinota huwante yanna uynummokkinni konne jawa gobbate diina murre hunnammora hasiissanno. Wo’ma Itophiyu daga wolqatennino ikko egennotenni halamme cancishaancho HWHT sharre kachafisiinsammora hasiissannono yiino.
Yaareed Geetaachew
Bakkalcho Maaja 8, 2013 M.D
