Hawaasa:-Hawaasi Quchumi investimentetenna turizimete mereersha ikkanno gede konne tayxe diro hala`ladunni loonsoonnita Hawaasi Quchumi Gashshooti Layinki Kantiwi kaa`laanchu Pirofeeserchi Tseggaye Tukehu xawisino.
Hawaasi Quchumi Sidaamu Qoqqowira qara quchumati; Sidaamu Qoqqowi wole qoqqowubanni ledo keenniro hala`ladda investimente Hawaasi industire Paarkenna Yirgaalamete Agiro industire paareke gedeerinna wolootta investimente noo qoqqowo ikkinota kulinohu Kaa`laanchu Piroofesere Tsegaye Tukehu, konni giddo jajjabba investimente noohu Hawaasi quchumi giddo ikkinota egensiisino.
Ledoteno kantiiwu, giddoydinna gobbaaydi dureeyye goshooshate, latisatenna investe assate widoonni tayxe mixonke keennummo garinni gumu leellinote yiino.
Quchumu turizimetenna investimentete mereersha ikkannohu keeru hee`riro, dagoomu ge’ino heeshsho massaga dandiiro ikkinota xawisinohu layinki Kantiwi; quchumu co’ichanna ga`labbo noohanna baalante dagara ikkannoha assate jawa looso loonsoonnita guwursino.
Quchumu wole quchummanni dooraminnoha ikkannohu keeraanchimmasi agarantinohanna giddosi nooha baala mittimmate hanqafinoha hattono keeraanchimansa buuxisiisinoha ikkirooti yiinohu k/p Tsegaye Tukehu, konne loosono quchumu teesaano ledo hasaawatenni jawa looso loonsoonni yiino.
Quchumu giddo noo dureeyye ledo ganba yine hasaawatenna safote latishshi qarrinna wolotta mitiimma heedhuro rahotenni halamme tiratenninna dawaro qolate widoonni loonsoonni loosinni luphiimu gumi borreesaminohura, quchuma haammata investumenetenna pirojekite bobbakkanni noota buuxisiisino.
Hawaasi Quchumi kawiinni roorino jiro, egenno, biinfille, dhuka, konforaansete mereershanna wole quchumma dagge lawishshanna gade soorridhannohanna wole quchummanni heewisame xaano dooraamaancho ikkanno gede giddoydinna gobbaydinni haammata investimente goshooshate sumimme assinanni hee`noonnitano kantiiwu qummi assino.
Wolu kaayinni “4G Lte advanced” Interineetete owaante konni quchumira hanafamasenni investimentenna turizime haaro yanneesinoonni tekinoolooje hasidhanni noo yannara 4G interineetete owaante afi`ra baayra kaayooti; quchumu investimentetenna turizimete mereersha assineemmo yineemmo woyte tini jawaata interineetete owaante konne quchuma dooraminoha assitanno yiino.
Itiyo-Telekoome quchummate jawaata rakkino 4J advaanside interineetete owaante iillishatenna dagoomittete qeechassino fulara Sidaamu Dagoomi Qoqqowi giddo 4G Lte adivaced interineetete owaante afidhanno quchumma Hawaasi, Yirgaalamenna Aleta Wondo ikkinnotano buunxoonni.
Abrahaam Saamueel
Bakkalcho Maaja 8, 2013 M.D
