Addis Ababa:- Gobbanke dhaggenni tayxe harinsoonnihu 6ki gobboomu doorshi keeraanchimmatenni gumulamino. Doorsha harinsanni yannara gobbankera kipho ka’anno, danchuri dihee’ranno yitanni balaxxe dudubbanni gobbankeha dancha macca hunate wo’naaltanni keeshshituri baalu xaa yannara doorshu guma faajje assini kawa insano danchummatenni kayissanninna naaddanni afantanno.
Wolu garinni 6kihu gobboomu doorshira qeeltinoti jireenyu paarte ikkitanna paartete murrichi Dr. Abiy Ahmedihunna paartesira gobbaydi gobbuwa hawalle tashshi yii’ne yitanni afantanno.
Afriku Mittimma komishiine murrichi Musa Faaki Mahmat xaphoomu ministerichi Abiyinna paartesi Jireenyaho doorsha qeelansanni hawalle tashshi yiihe yitanno sokka saysino.
Musa Faaki Mahmat mittimma riqiwe saysino sokkanni doorshu keeraanchimmatenni gumulamanno gede qeechansa fultinori doorshu boorde, hettisamaano paartuwa, siivikete maamarrara galatasi shiqishino.
Doorshaho hasiisannori anje hattono koovidi-19 fayya dandiine doorshu hasi’noonni gede danchummatenni gumulamanno gede baalunku qeechi jawaho yino.
Albihu Nayijeeriyu pirezidaantichi Oliseengon Obasaanjonni massagamannohu mittimmanniti towaatte la’anno gaamo harinsoonni doorsha la’unte gede babbaxxitino korkaattanni harinsoonnikki basera Fooqu agani 2013M.Dra harinsanni doorshano towaatte la’annota Musa Faaki Mahmati lede xawisino.
Chaynu Itophiyu keeraanchimmatenni gumultino doorsha lainohunni hawalle tashshi yino’ne yitanno sokka sayissu.
Chaynu Itophiyu tayxeeha 6ki gobboomu doorsha keeraanchimmatenna danchu garinni gumulasenni hawalle tashshi yino’ne yitanno sokka sayissino.
Chaynu gobbaydi hajo ministere qaalu sayisaanchose ikkinohu Liyan Zhao widoonni sayissino sokkanni; Itophiyu harissino doorshi danchu garinni gumulamasi xawisse aanteteno lamenti gobbuwa dagansa horaameeyye assate halante loossannota kultino.
Itophiyu Chaynaho istiraateejaawe halamaancho ikkase qummi assinohu qaalu sayisaanchi; Chaynu Afriku halammerano Itophiyu lowonta hasiissanno gobba ikkase xawisino.
Jibuti Pirezidaant Omar Gillehuno hattonni xaphoomu ministerichi Abiy Ahmedihura hawalle tashshi yinohe yitanno sokka saysino.
Jibutete pirezidaantichi Omar Gilleh Ella 14/2013M. Dra harinsoonniha xaphoomu gobboomu doorshira xaphoomu ministerichi Abiy mootimma safi’rate dandiissitannosi huuro afi’rasinni hawalle tashshi yinohe yino.
Pirezidaantichu sokkasinni; ‘’Ate massagonni ninke baxillaano ikkitinoti Itophiyu daga muli yanna giddo jiroo’mitannonna yannate hayyonna hornyano adhitanno dagoomi kalaqamanno gede noonsa ajuuja kalqete dagoomira leellishshanni afantanno’’ yaanni coyi’rinota Jibutete Itophiyu Eembaasenni afi’noonni mashalaqqe leellishshanno.
Amadisiiseno lamente gobbuwa roduuwimma roorenkanni kaajjitanno gede ammanannotano pirezidaantichu lede coyi’rino.
Nayijeeriyu pirezidaantichi Mohammedu Buharino isi widoonni Dr Abiy Ahmedihunni massagantanno paarte doorshaho rooriidi anaga amaddino huuro afi’ratenni dagate riqiwamaano amaale mini barcumano hattonni luphi yitino kiiro amaddinota afi’ra dandiino daafira macciishshaminosi hagiirre xawisino.
Sokkasinnino ‘’Harunsitinanniti dancha poolisenni daga’ne heeshsho woyyeessatenna soorrate loosa’ne kaajjitine sufa hasiissanno’ne’’ yino pirezidaantichu.
Wolotuno haammata gobbuwa babbaxxitino dagoomitte mashalaqqe qoolinsaranna bilbilunnino hawalle tashshi yinohe yitanno sokkansa sayissinota afate dandiinoonni.
Amsaalu Felleqe
Bakkalcho Maaja 8, 2013 M.D
