Qoqqowu wedelli babbaxxitino danchummate loossa aana beeqqaano ikkatenni hanafote aana noota danchhummate loossa rakinota assanna dagate hale ikkansa leellisha hasiisannonsa yino Sidaamu qoqqowi pirezidaantichi kalaa Desti Ledamohu.
Pirezidaantichu tenne yinohu qoqqowoho 2013 M.D wedellu hawadi yanna dancha fajjo looso faajjetenni hananfi yannaraati.
Kalaa Desti ledotenni; diilallote gade soorro mannu ooso heeshsho aana iillishshanni noo qarra ajishatenna gobbannita dubbu jiro lossate “gobbanke uddisiinso” yaanno adawarshinni gobbate gede hananfoonniha latishshu looso jawaatinoha assate wo’manti qoqqowu daga baxxinohunni wedellu illacha tugge beeqqa hasiissannonsa yino.
Iedoteno mundeete anjenni lubbonsa hoogganno daga gatisate mundeenke aatenni; hattono dhukuu noonsakkire hassiisannonsarinni kaa’latenni hanafote aana nooha danchummate looso irkisa baalinkewiinni agaramanno looso ikkasi duure huwachishinno.
Sidaamu qoqqowi meentu, qaaqquullunna wedellu biiro Layinki sooreessinna wedellu handaari sooreessi kalaa Aklilu Alamuhu isi widoonni; tayixe hawadi yanna dancha fajjo loosinni 540 kume wedella beeqqisiisatenni 13 qara qara looso loonsannita xawise, biironke gede “Itophiyanke dancha fajjo owaantenni haanja latishsha uddisiinso” yaanno massagote qaalinni chiginye hala’ladunni kaansannita, baadiyyete heedhanno wedelli dhuka ajjinore giwirinnu loosinni kaa’litannota, kaajishshu roso uynannita, koroonu xisso lede taraawanno dhibbi aana huwanyo kalaqate loossanna W.K.L looso gumullannita xawisino.
Konninnino 1.8 Miliyoone ikkitanno daga horonsiraano assatenna boco Biliyoone mootimmate fulo gatisate mixo amandoonnita kalaa aklilu egensiisino; hanafote yannarano Hawaasi quchumira Taaboori ilaali aana 500 wedelli ledo ikkatenni 200 kume chiginye kaansoonniha ikkanna, Honse dhuka ajjino maatera mine haaroonsine minatenni hananfoonni.
Barraho xaphooma Sidaamu qoqqowira babbaxxitino danchummate loossa aana bobbakke gummaamma ikkitino mereershuwara qoqqowu mootimma 5 Miliyoone birra fulo assatenni baraarsha uytino.
Qiddist Gezaheny
Bakkalcho Maaja 8, 2013 M.D
