Addis Ababa:– 6ki gobboomu doorsha harinsi barra calla huuro aate qoteho haanju harumi latishsha worate gumulantino chigginye kaasate qixxaawora dooraano 87.4 miiliyoone chigginye kaasansa giwirinnu minisiteere egensiissu.
Giwirinnu minisiterenni kalaqamu jiro latishshi agarooshshi dayirektere kalaa Tafarri Taaddesehu xawisino garinni, dimokiraasete sumuda doorshunni, haanja sumuda chigginye kaasatenni adda assate doorshu barra ella 14 2013 m.d gumulantino qixxaawora 87. 4 miiliyoone chigginye kaansoonni yiino.
Kalaa Tafarri xawishshi gede, Itophiya uddisiinso yitanno massagote hedonni onkoleessu aganira 6 biiliyoone chigginye kaasate hanaffino qixxaawo harisantanni afantanno. Konni ka`iminni hawadi xeena afidhanno qooxeessuwara yaano wodiidi daga dagoomi qoqqowira, Oromiyaho Guji Booranira, Sidaamaho doorshu harisamara albaanni xaphooma sasente qoqqowubbara calla 545 miiliyoone chigginye kaasantino.
Konni ka`iminni doorranni kaanseemmo yitanno massagote hedonni harisantanni nooti haqqu kaasa hawadunni kaasate qixxaawo giddo ikkasi buuxisiise, soojjaato Amaaru zoonnara, Oromiyaho mite mite zoonnaranna wole qoqqowubbara xaaddino xeenu anje korkaatinni 117. 3 miiliyoone chigginye dooraanotenni kaasate mixo amandoonniha gumulate didandiinoonni yino.
Ikkirono ayi gobbara assinoonnikki rosicho – adhinara hasiissanno dancha qansootu beeqqo gobbankera leellanno garinni eembarra loosu aana hosinota xawisino.
Moolle gardadhanna haanja uddisiisate assooti mitte uurrinshaha woyi mangisitete tantano hajo calla dikkitino yinohu kalaa Teferra, quchumahonna baadiyyete afantanno dagate kifilla chigginye kaasate sayinse woyi giwirinnu ogeeyye hajajonna harunso ka`ima assatenni chigginye kaasate loosira e`anno gede xa`mino.
Isi xawishshi garinni, tayixe “Itophiya uddisiinso” yitanno massagote hedonni hanafinohu haanju harumi latishi qixxaawo 6 olluu gobbuwarano beehate 1 biiliyoone chigginye qixxeessantino. Beehateno balaxote qixxaawo jeeffino.
Muli yannarano beehate qixxaawo Ertraho, Jibuti, Keeniya, wodiidi Suudaaneranna Suudaanete harinsannita kalaa Teferra coyi`rino. Konne looso lifixisate hajo la`annonsa bissa qeechansa fultanno yee coyi`rino.
Abebech Maatewoos
Bakkalcho Ella 17/2013 M.D Hamuse
