Addis Ababa:- Gobboomu amaalammera meentu baqqinaatunni beeqqanno gede assate loosanni afantannota Itophiyu Meentu Federeeshiine xawissu.
Sette bixxille amaddino meentu amaalammete sirnyano Komishiinete shiqishshino.
Itophiyu Meentu Federeeshiine Pirezidaante Dukko Askaale Lemma sinya Komishiinete shiqinshi yannara uytino xawishshinni; Federeeshiine ajanda gamba assite hasaawaho shiqishate alabaanni tantanote hundaanni noo meentira huwanyoote kalaqatenni meentu amaalammete luphiima beeqqo heedhannonsa gede assate loossanni keeshshitinota coyidhino.
Gobboomu deerrinni mootimma meentoho uytino illachi dawaro afidhino xa’mubba noota kulte; Federeeshiine gobboomu deerrinni gamba assitinoha hasaawu ajanda Itophiyu Gobboomu Amaalammete Komishiinera shiqishshinota qummeessitino.
Ajandaho amandoonni bixxillubbano meento miinju dhukansa lossa, rosunna dandoote lopho xa’mo, meentu fayyimma hajo, baattotenna jajju ha’nurimma xa’mo, farcotenna seeru woyyeesso, poletiku riqiwo hattono beeqqo, dagoomitte huwanyootenna akatu soorro labbinore ikkansa xawissino.
Meentu kayissanno xa’mubbano hasaawunni tidhantanno gede assatenni meentu miinjunni, dagoomittenna poletiku handaarranni beeqqaanchimmansa buuxisiisate hedo amandoonnitano Pirezidaantitte huwachishshino.
Ka’ino xa’mubba baalanti Komishiinete shiqqinoha ikkirono baalanti xa’mubba dawaro dawaro afidhanno yine hendanni yaa ikkikkinni dagoomu torbanno gede assatenni seeru ragaanni leeltanno xe’ne, iillitanno hekkonna mallaande gattanno gede injo kalaqate ikkinota qaagiissitino.
Itophiyu Gobboomu Amaalamme Komishiine Komishiinerchi Pirofeeser Mesfin Ariaya isi widoonni; meentu aana iillitannota qoossote miiconna duumbara gatino laooshshe gatisa hasiissanno yee; shiqino sirnyi aana guuta ikkino hasaawa assinannita coyi’rino.
Federeeshiineno xaaddanno qarrubba tirantanno gede agarranni qeecha fula hasiissannotano huwachishatenni.
Amsaalu Felleqe
Bakkalcho Dotteessa 30, 2017 M.D
