Hawaasa:- 6kihu gobboomunna qoqqowu doorshi qoqqowu giddo ga’labbote qarri kalaqamikkinni keeraanchimmatenni gumulaminota Sidaamu dagoomu qoqqowi keerunna ga’labbote biiro sooreessi kalaa Alemaayyehu Ximootiwoosihu egensiisi.
Qoqqowoho tayxeeha 6ki doorsha balaxote doorshu qixxaawo yannanni hanafe doorshaho huuro uyini barrano mitturino ga’labbote qarri kalaqamikkinni duuchunku qooxeessira noohu 19nku doorshu qoqqowira 2234 doorshu mereershuwara doorshaho ikanno uduunni garunninna keeraanchimmasi agarantino garinni iillannonna dooraanono yaadisannori nookkiwa huuronsa uyitanno gede ga’labbo agaratenna teessiisate loossa kaajjadu garinni loonsanni sa’noonnitano biirote sooreessi huwachishino.
Daga keeraanchimma hasidhannore ikkansannino qooxeessinsa ga’labbo uminsanni agartanni ga’labbote bissa ledono halantanni qooxeesuwate keeru booraawikkinni doorshu harinsho gumulantanno gede assitino irkorano kalaa Alemaayyehu galate saino.
Qooxeessaho baxxinohuni Oromiyunna Wodiidi qoqqowi ledo dannunni xaandani qooxeessuwara gaance kalaqantanno yine huluullammoonniwano ga’labbote qarri kalaqamannokki gede balanxe qixxaawo assatenni lamente qoqqowubba mootimana qooxeessu daga ledo halamme loonsoonni daafira doorshu keeraanchimmatenni gumulamanno assinoonni.
Albilichono dagate keere booreesate wo’naaltanno wolquwa heedhara dandiitannohura qoqqowunna deeru deerrunkunni afantannoti ga’labbote bissa kaajjillunni loossanoha ikkanna dagano albinni roorenkanni qooxeessu keeraanchima daafira baqqinaatunni agartarana huluullisannori hee’riro rahoteni haja la’annonsa bissara qummeessa uyitanna hasiissannota taashshote qaafo adhatenni ga’labbo geisate qoqqowu mootimma hashsha barra loossanni afantannotano biirote sooreesi lede xawisino.
Dorshaho huuro uyini barrano doorshu uduunni anje kalaqanturono haja la’annonsa bissa ledo qinaanbe ledotenni dayinoha huro uyinanni uduunne rahotenno iillishate baxxinohunni Hawaasinna qooxeesaho afantanno woraddara kaameelunni; xeertote afantannori Bansi,Cirrenna Arooreesu doorshu qoqqowubbara kayinni keeraanchimmasi agarantino garinni helikopteretenni iillinsheenna huuro aate harinsho keeranchimmatenni gumulama dandiitinotano lede qummi assino.
Leyikiha gobboomunna qoqqowu doorshi gumulama harunseno qoqqowoho kalaqamara dandaanno canci nookkitanna miteekke kalaqamara dandaannori hee’riro kayinni ga’labbote bissa hasiissano qaafo adhatenni daganke keeraanchimma agarsisate qixxaabbe nootano xawisino.
Amsaalu Felleqe
Bakkalcho Ella 17/2013 M.D Hamuse
