Hawaasa:- Qoqqowoho doorshu keerunni jeefiinota la`inohunni wodiidi qoqqowi prezidaantichi kalaa Ristu Yirdaw doorshu keerunni jeefisamasi daafira qansichimmate yawo fultino qoqqowunna baalante Itophiyu dagara hawalle tashshi yitanno sokka sayisino.
Gobbanke dhaggennihanna hanaffinota dimokraasete harinsho mitte qaafo qaaffino doorsha harissino yinohu prezidaantichu, daganketi yaaddo ba`eenna qoqqowoho doorshu keerunni gumulamanno gede assinoonni yino.
Doorshu keeraanchimma booreessate sharrantino wolqano nootanna ga`labbote tantano baqqeenyu beeqqo daganke qeellera ikkino doorshi harino yino.
Daga xeenunna arrishsho macciishshantunsakkinni seeda dira cincatenna uminsa keeraanchimma uminsanni agarte doorshaho huuronsa uyitino.
Doorshu harinshoranna keeraanchimmara hashsha barra daafurtino bissa leellishshino jawaanteno lowo geeshsha maalalinannite yino prezidaantichu. Qoqqowoho doorshu harinsho xawadonna dimokraasenniha ikke jeefisamanno gede doorshu gumulsiisaano, qoqqowunna federaalenniti hattono deerru deerrunni afantanno ga`labbote tantano qoxeessu keeraanchimma agarantinota ikkitanno gede jawa waaga baatte gobbanke dimokraasera jawa ikkino sumuda wortinohura woyya galati hasiisannonsa yino kalaa Ristu.
Qoqqowoho jireenya lede 23 hettisamaano paartuwa doorshu harinshora co’immatenni ge`ino garinni beeqqatenni Itophiyu qeeltanno gede qeechinsa baala fultino. Wolootuno siiviikete maawarra, baalanti qoqqowu massagaano, wedellunna seennu tantanubba, gobbanke dimokraase gatamaarshira jawa safo tuggino; doorshano maala`lisanno garinni Itophiyu qeeltinno doorshaati yeeno coyi`rino.
Doorshu huuro kiirate gedensaannino paartuwa guma sumuu yite adhatenninna qeelaancho ikkitanno paartenna safantanno mangisite ledo halante mittimmatenni gobbanke lophoranna mittimmara loonseemmo harinsho kalaqama noose yino.
Doorshu barra gobbanke tidhantannokki gaance e`anno yite gojidhinori giddoyidinna gobbayidi gobbuwa wolqa saalfatino doorshaati harinsoommohu yinohu prezidaantichu; harinshonna gumu kayinni dagankeranna gobbankera jawa qeelle; umbammora hasidhannorira kayinni shollinyenna qeelamme uddisiisinoho yino.
Itophiyu demokraasete reekkosera jawa safo tuggino doorshanna gobbankeha gotti yaanna xawaabbu yanna buunxanniho yino.
Abebech Maatewoos
Bakkalcho Ella 17/2013 M.D Hamuse
