Hawaasa:- Gobbankera harinsoonnihu 6kihu gobboomunna qoqqowu doorshi Itophiyu dimokiraasete harinsho garunni hanaffinota leellishannoha ikkasi Sidaamu dagoomu qoqqowi pirezidaante kalaa Desta Ledamohu egensiisi.
Quqquxammanni agadhinoonnihu tayixehu gobboomunna qoqqowu doorshi qoqqowoho ikko gobbate deerinni keeraanchimmatenni gumulamasinni qoqqowunna gobbanke daga baalanta hawalle tashshi yino’ne yitanno sokkano pirezidaantichu saysino.
Harinsoonni doorshira haammata dooraano beeqqaano ikkitinotanna hettisamaano paartuwano hala’dunna danchu garinni heewisantanni sa’inoha ikkasino kulinohu kalaa Desta; konninnino gobbanke hasidhanno doorsha danchu garinni harissinotanna dimokiraasete harinshono haffinota leellishannoho yaanni coyi’rino.
Itophiyu wolapho yaadissannonsarinna daganke uminsa hajo daafira uminsanni hasaabbanninna sumuu yitanni gumultanokki gede hekko kalaqate wo’naaltannori gobbaydinna giddoyidi hunote wolquwano ikkituro xa Itophiyu qeeltinona diinnankera umu damuume; dagankera kayinni qeelle abbino doorshaati harinsoonnihu yino qoqqowu pirezidaantichi.
Gobbanke harissinohu 6kihu gobboomunna qoqqowu doorshira huuro aate harinshora dooraano daganke seeddanna dira amadde gobbankera dimokiraase buuxisatenna huuronsanni gobbanke wolapho daafira gumula dandiitinohurano qoqqowinkenna gobbanke daga baalantera jawu ayirrinyinna galatu hasiisannosa.
Qoqqowoho doorshu harinsho coitte, keeraanchonna halaalaancho ikke gumulamanno gede qeechansa fultinori hala’lado dooraano daga, deeru deerrunkunni nooti ga’labote bissa, hettisamaano paartuwanna mootimmate massagaanonna doorshu gumulsiisaano gobbansa doortannonna wolaphose doogo fantinore ikkansanni naaxxineemmonsareeti yinohu kalaa Desta; albillichono qoqqowinkenna gobankera latishshanna dancha gashshoote halashshatenni daganke buximatenni fushshinanni harinshora doorshu guma faajje assini gedensaannino qeeltino paartenna mootimma ledo halamme loossa gobbatenna dagate soqqansho garunni fula agarrannitano amadisiisatenni.
Doorsha gumulloommo; kayinnilla yanna uyinannikkinna ga’ara yine dinye amande gashshi’nannikkitinna huxxite amaddinonke buximanni harancho yanna giddo fulateno daganke baalanti latishshu loossara yannansa uyitannonna mootommate ledo sumuu yitanninna halantanni latishshanna dancha gashshoote sufisate assinanni harinshora agarranninsa qeecha fultanno gede amadisiise sokkasi saysino pirezidaantichu.
Ninke mimmitu ledo sumuu yinummoro gobbanke hajo daafira uminkeni muro sayisanna gumula daandaate qoosonke ayino ho’lankera didandaanno; konnirano mimmitu ledo macciishshammanni gutu hajonke daagira gutunni gumulate harinshonke kaajjinshe sufisa baalunkuwiinni agarrannita ikkaseno qummi assino.
Amsaalu Felleqe
Bakkalcho Ella 17/2013 M.D Hamuse
