Amsaalu Felleqe
Wondo Gennete:- Quchumu Hoteelete, Loojete hattono daddalu loossara jawa wolqa noosihura dureeyye quchumaho dagge loosidhanno gede quchumu kantiiwi woshshatto assino.
Quchumu kantiiwi kalaa Irdaachew Eeliyaasihu baxxinohunni Itophiyu Pireesete Uurrinshara xawisino garinni; Wondo Gennetete quchumi Hawaasi quchumira mule hee’rasinna kalaqamu jiro ikkinohu iibballicho hala’ladunni noowa ikkasinni dureeyye tenne jiro latisse uminsarano ikko quchumaho jiro kalaqa dandiitanno yino.
Kantiiwu xawishshi garinni; quchumaho bunu, gummate laalonna babbaxxinori giwirinnu laalcho ikkinori hala’ladunni dikkote shiqannowa ikkanna; quchumuno tenne dikkonni barrunni 500 kumi ale ikkanno birra eo gamba assannota huwachishino.
Wondo Gennetete quchuma Itophiyaho afantanno quchummanni baxxinoha assannosihu diro wo’ma dikko uurritannowa ikkasira aleenni kiirotenni 50 kume sa’anokki teessaano heedhannowa barru giddo boco miiliyoone birri ale eo gamba assinanniwa ikkasiiti yino.
Quchumu afi’ranno eo bikkinni hasiisannosi latishsha afi’riikkinni keeshshino yinohu kantiiwu; konni kaiminnino teessaano quchumaho hasiisanno latishsha halashshinanni gede duucha yannara xa’mitanni keeshshitinota xawisino.
Quchumaho xaa yannara giddo doogga, du’namaanchu ha’ranno diiche, seesallicho kincho karatenna woloottano dagoomaho horonna owaante uyitanno uurrinshuwa loonsanni hee’noonniha ikkanna hodhishshu bobbanke owaante woyyeessateno muli barri giddo kaameelu hoowe loosate base doorre balaxote qixxaawo assinanni hee’noonnitano kalaa Irdaachew lede xawisino.
Quchuma albillichono haaro pilaane garinni massagatenni hasiisanno latishsha wonshinanni yinohu kantiiwu; qoqqowu mootimmanna Hawaasi quchumi gashshootino jawa illacha tugge irkissanni afantannotano qummi assino.
Bakkalcho Ella 10/ 2013
