Abebech Maatewoos
Addis Ababa:– Hunote wolquwa addi addinninna mittimmatenni babbaxxitino henbeelletenna cancishate ajandubba qixxeessite bushu assootira qixxaabbanni noota mashalaqqetenni buuxa dandiinoonnita Biheeraawete keeraanchimmanna mashalaqqete owaante dayireekiter jeneraal Temesigen Xiruneh egensiisi.
“Federaalennitinna qoqqowu ga`labbotenna keeraanchimmate bissa qinaawote looso suffanno keeraanchimmara” yitanno massagote hedonni federaalennitinna qoqqowunniti keeraanchimmatenna ga`labbote wolqa yannannita gobbate keeraanchimma keenanno hasaawa tenne lamalara harinsi yannara kalaa Temesigen xawisino garinni; Abbayi haaroo’mate kofattora layinki doyicho waa wonshatenna 6kiha gobboomu doorsha harisate qixxaambanni hee’noommo rawora Itophiya gibbanno uurrinsha noonsari giddoyidinna gobbayidi gobba wolqa canconna mundeete du`nama kalaqantanno gede sharre loossanni noota gaamote mashalaqqe noose.
Kuri hunote wolquwa balaxxe haaroo’mate kofattonna doorsha gufisate mitiimmuwa dancha hedeweelcho gede assite horonsi’ratenni addi addinninna mitteenni qinaabbe babbaxxitino henbeelletenna cancishate qaafo biddi assidhe qixxaabbinota mashalaqqete loosinkenni buuxate dandiinoommo yino.
Henbeellete wolqa dhuka hoogge ikkinninna gobba diigatenni badhera dihigganno yinohu kalaa Temesgeni; doorshu harannokki gede, harirono adhamooshshu hee’rannosikki gede henbeellete gawajjo iillishate loossanni keeshshitino. Qinaawinoha kaphu duduwo tuqisatenni doorshu dagate giddo ammanamannokkinna adhamooshshu hee’rannosikki gede mixidhe loossanni keeshshitinotano coyi’rino.
Federaaletenni, qoqqowunni keeraanchimmatenna ga`labbote gaamo bissa hiitti millimmonsa illete maaxaminoha dikkino yinohu kalaa Temesigen; wolqansa lowo geeshsha shiima ikkitinotano keennoommo yino.
Gobbannita Biheeraawete keeraanchimmanna horo buuxa dandiinannihu federaalete, qoqqowoho, olluubbate gashshootiwanna dagate mereero noo jiro taalo horonsi’ra dandiinirooti yinohu jeneraal dayireekiterchu; ga`labbote bissa addi addinninna mitteenni soqqanshonsa luphiima deerrinni yawonsa fultanni afantannota egensiisino.
Mootimma wortino ragi garinni aantete soqqanshonsa danchu garinni fulate dandiissiisannoha soorrote looso loonsoonni. Ga’labbote wolqa waaga baatatenni gobbate wolapho agarsiisate qixxaabbinote yino.
Itohpiyu sa’u shiima dirrara giddonna gobbayidi gobbuwa wolqanni kalaqantanno sharrenni sayissino jiffanna jifote yanna hanbannire dikkitino. Doorshu gobbannita keeraanchimmanna horo agarsiisa dandaannoha ikka noosi gedeno coyi’rino.
Bakkalcho Ella 10/ 2013
