Addisu Adoola
Addis Ababa: Haanju harumi hanafi kawa qoqqowu giddo dubbu iillo 5 anga xibbunni lophitinota Sidaamu Qoqqowi Pirezidaantichi Kalaa Desta Ledamohu xawisi.
Sidaamu Qoqqowi Shabbadiini Woradi Dila-Afaraaru ollira qoqqowu sayikki doycho haanju harumi hanafote amanyooti ha’ri yannara Kalaa Desti Ledamuhu egensiisino garinni, haanju harumi hanafi kawa qoqqowu giddo dubbu iillo 5 anga olluu gobbuwara 500 miloone chigginyubba qoqqowu deerrinni baraarsate qixxaawo assinoonnita xawisino.
Qoqqowu giwirinnu biro sooreessi Kalaa Mesfiini Qarrehu isi widoonni haanju harumi pirograame qoqqowinke laalchinna laalchimmara illete leellanno guma afisinota qummi asse baxxeewo garinni 2012 M.D hanafe Sidaamu Buni kalqete deerrinni 1-3 geeshsha amadinoha ikkanna tayxe “Cup of Excellence” deerrasi agarsiise kalqete deerrinni agarsiisa dandiinoonnitano xawisino.
Haanju harumi giwirinnu laalchinna laalchimmara gotti yiino qeechi noosihura dagoomu waalchisinni hanafe babbaxxitino chigginyubba kaysatenni qeechasi fulara hasiissannono yiino.
Ella 14, 2013 M.D gobbankera lame haruma worreemmoha ikkinohura barraho naggi yitino chigginyubba qixxaabbinotano coy’rino.
Oromiyu Qoqqowi Pirezidaantichi kalaa Shimellisi Abdisihu isi widoonni, haanju harumi gaadira miinju lophonke buuxisiisate qaru qeechi noosita coy’rino.
Ollu gobbuwara baraansanni haqqu kaashshi baca tiro afi’rinoho yinohu kalaa Shimellisi, mittimmanke qoqqowo qoqqowunni xaadissannota calla ikkitukkinni Afriku gobbuwa xaadissannota ikkase buuxisino. Gobbaydi mereero e’ne ajisha dandiineemmohu giddoydi mittimmanke kaajjitinota ikkiturooti yiino.
Giwirinnu Ministeere Ministeerchi Kalaa Umeri Huseenihu, haanju harumi qarqaru akata soorratenni hattono kalqete deerrinni xiiwo kalaqqanno diilallote jiro soorramme gargardhatenni sae laalchonna laalchimma lossanno yiino.
Haanja haruma hanafisiisate amanyooti aana Qoqqowu pirezidaantichi Kalaa Desta Ledamohanna Oromiyu Qoqqowi Pirezidaanticha Obbo Shimellisi Abdisiha lendeenna giwirinnu ministeere ministeerchi Kalaa Umeri Huseenihu, qarqaru, dubbunna diilallote jiso soorro komishiine komishiinere Pirofeeseri Fiqaadu Beyyenehunna jajjabba federaaletenna qoqqowu loosu sooreeyye afantino.
Bakkalcho Ella 10/ 2013
