Keeraanote Aana Assinanni Gawajjono Mootimma Uurrissanno Gede Xa`mitino
Cancishaano shene Oromiyu dagoomu qoqqowi mootimma Wollaggaho ayimma kaima assino garinni keeraano qansooti aana iillishshanni noota barshenna guffamme effidhe giwatenni mootimma keeraano qansooti aana iillitanno gawajjo uurrissanno gede hettisamaano paartuwa xa`mitu.
Cancishaano shene tenne sa`u lamalanni hanafe soojjaati Wollaggira keeraano qansooti aana iillishshanni noo barshenna guffamme lainohunni Amaaru dagoomi millimillo, Itophiyu qansooti dagoomittete farcora, Ennaat paarte, Itophiyu daga mittimma paartenna baalunku Itophiyu mittimma uurrinsha xawishsha uytino.
Paartuwa xawishshinsanni; sa`u dirrara Wollaggaho ayimma kaima assatenni gumulantanni noo gawajjo uurra nooseta huwachishshino. Paartuwa uytino xawishshinni mootimma keeraanote gawajjo rahotenni uurrissanno gedenna mootimmate tantano giddo ikkite cancishaano gaamo irkissanno mootimmate loosu sooreeyye aana qaafo adhinanni gede hattono mootimma tantano qorqortaranna hunaanote aanano seeru qaafo adhitanno gede xa`mitino.
Ledoteno paartuwa uytino xawishshinni; mootimma hajote aana xawishsha aa noosetano xa`mitino. Miidiyubbanna babbaxxitino siiviikete maamarra mannu guffammenna doddolu uurranno gede uminsa qeecha fula noonsa yitino.
Jeefoteno baxxinohunni ama paarte, Itophiyu dagoomi mittimma paartenna baalunku Itophiyu mittimma uurrinshi fushshino xawishshinni sa`u shoole dirrara gawajjo iillitinosari qarunni Amaaru ilama ikkito ikkinnina oneg shene irkissannokkiti Oromote ilamano kuni qarri iillinonsa yitino. Oromiyu qoqqowi mootimma qoqqowu giddo afantanno teesaano keerenna hobbaate agarate yawo noosi yaatenni egensiissino.
Abbebech Maatewoos
Bakkalcho Bocaasa 29, 2015 M.D
