Addis Ababa:- Qooxeessaho noore lendanna babbaxxitino gobbuwa duumu baari qooxeessa amadate hasatto leellishshanni dagginota Gobbayidi hajo ministere qaalu sayisaanchi Ambaasaadder Diina Mufti xawisino.
Gobbayidi hajo ministere qaalu sayisaanchi Ambaasaadder Diina Muftihu lamalate xawishsha uyino. Ambaasaadder Diina lamalate xawishshinni xawisino garinni; muli yanna kawa alba noo gobbuwanni aleenni wolootu gobbuwa Duumu baari qooxeessira olantote olu mereersha safatenna qooxeessa amadate luphiima hasatto leellishshanni afantanno.
Alba qooxeessaho olu mereersha safatenni aleenni woxunna olu uduunni dhukansa kaajjishidhanni dagginori wolootu gobbuwa basete aana illachansa tugganni daggino yinohu Ambaaasaadder Diina; tini hasatto kayinni Duumu baari qooxeessira batinye daga heedhanno gede assitanno daafira mitiinsanno akata kalaqanno yaanni egensiisino.
Ambaasaadder Diina xawishshisinni; tenne lamala giddo xaphoomu ministerichi Abiy Ahimedihu aantanno 100 shiimaaddanna manaadda kofatto loonseemmo yaasi harunsite Gibtsenna Sudaane hajo iibbibbishshanni noota harunsine; ‘’seera ayirrinse ha’nummo geeshsha mitte gobba massagaanchi 100 kofatto gatamarreemmo yiiro qarru maati?’’ yine xa’minoonninsa.
Ambaasaadder Diina xawisino garinni; kalqenniha seera ayyirrinsummo geeshsha 100 kofatto agurranna 1000 kofatto loonsummoro wole gobbuwa aana qarra dikalaqanno.
Qiddist Gezaheny
Bakkalcho Onkoleessa 26/2013
