Hawaasa:– Kaa’laanchu pirofeeserchi Tasammi Eliyasihu baxxinohunni Bakkalcho gaazeexira xawisino garinni; rosiisa, xiinxallo assanna qooxeessu dagara addi addi owaante aa, yuniversituwate uyinoonni qara sokko ikkansa kule; konni garinni Hawaasi yuniversiterano seeru goli widoonni mereersha uurrinse baatooshshi-weelo seeru amaale owaante uyinanni keeshshinoonnita xawisino.
2003 Awuroppu kiiro garinni uurrinsoonni mereershi widoonni addi addi mootimmannita ikkitinokki uurrinshanni afi’nanni irkonni baatooshshi-weelo seeru amaalenna woxu wolqa noonsakkiri qote uurrine owaantanni keeshshinoonnita xawisinohu dayirekterchu; mereeroho tini kaa’lo taxxi yite keeshshitinota qaagiissatenni sasu diri kawa kayinni Awuroppu mittimma ledo halamme loonsanni hee’noonnita coyi’rino.
Xaphooma tini seeru amaale owaante alba Wodiidi qoqqowo, xa kayinni Sidaamu qoqqowiranna qooxeessaho noo Oromiyu Qoqqowi zoonna iillo assitannoha ikkanna; babbaxxino qooxeessira konni alba 6 mereershi nooha xaa yannara 11 iillinshoonnita xawisinohu kaa’laanchu Pirofeeserchi Tasammi Eeliyasihu; Lamu Galchimi Arsi Zoonnara Shaashamannete quchumira afamannoha ikkanna sasu Hawaasi quchumira, lamu Irgaalamete, mittu Bansa, mittu Borrichaho, mittu Lakkotenna Mittu Wondogennetete quchummara afantannota lede qummi assino.
Xaa geeshsha noo yannanni 50 kumi ali manni seeru amaale owaante afidhinotanna 1kumi ale ikkanno manni hajo yoote shiqinshe qeelle amaale uyinoonnita coyi’rinohu mereershu dayrekterchi; baxxinohunni miinjunni dhuka ajjinorinna uminsanni yekkeeramate dandiitannokkiri, xisso noonsari, bisu xe’ne noonsari, geerru, meentu, qaaqquullunna shiimu baatooshshinni heeshshonsa massaggannori dagoomu bissa qarunni tenne owaante horaameeyye ikka dandiitannota kayisino.
Ikkollana dagoomunniwa Yuniversite tenne owaante uyitannota afa hoogate qarri noota kayise; daga owaantete horaameeyye ikkitanno gede farcote bissa, yoote minna, seeru allaalshi biironna Industurete paarke ledo halamme hattono Radoonetenni egensiishsha loonsoommoha ikkanna konninnino mannu afa hanafinota kulino. Konni gobbaanni hawadi yannara loosaasinetenna rosiisaanote ledo ikkatenni ragiweelo usuramino manna polisete mereersha marre dhaaddotenni afi’ratenni owaante uyinoommo; konni garinnino mannu mashalaqqe macciishshanni owaanteno afi’ranni no yino.
Xaa yannara Awuroppu Mittimma ledo hananfoommo pirojekte goofasenni loosu shiima yannara uurre afamannoha ikkanna Yuniversite looso wo’munni wo’ma haadhe loossanno gede Piroppoozaale shiqinshe hee’noonnita qummi assinohu K/Pirofeeserchi; kaajjinsheenna Yuniversite looso hanaffanno woyte dagoomu garunni owaantete horaameeyye ikka hasiissannonsata duure huwachishinno.
Owaante aa hananfanni woyte konni alba noo mereershubba noo garinni suffannoha ikkanna uurrinshuwa uytanno owaantera mannu kakkaooshshi hee’ra hasiissanno; afikkinni qoossosi xiiwantino manni batinyeho; konnira mayi hasiisanno’’e yine buunxe kaayyote horaameeyye ikkate qixxaawa hasiissanno yaanni dayirekterichu sokkasin sayisino.
Qiddist Gezaheny
Bakkalcho Onkoleessa 26/2013
