Hawaasa: Itophiyu Pireesete Uurrinsha ledo keeshsho assinohu Sidaamu Dagoomu Qoqqowi Mootimma Daddalunna Industirete Biiro Layinki Sooreessinna Daddalu Handaari Sooreessi Kalaa Baxiso Deewisohu xawisino garinni; biiro Faasiku Ayyaani yannara kalaqantanno shiqote anjenna seerimale wagu lexxo heedhannokki gede giwirehayle uurrisse loossanni no.
Waagu lexxo callano ikkikkinni ayyanu yanna golo assi’ratenni horote yannansa sa’ino sagalenna sagalete wodhinannire hattono mannu lubbo aana qarra iillishanno allaggare karsite dikko shiqishshanno daddalaano heedhanno gede qummeessinohu sooreessu; giwirehaayle kuri aanano kaajjado qorqorsha assitanno; biironkeno mannu lubbo aana haariimo nookki daafira togoo bissa aana maaro nookki qaafo adhitanno yiino.
Ayyannate yannara waagu lexxo daga mitiinsitanno gede xawisinohu sooreessu; ayyaanu yannara calla ikkikkinni sufo noo garinni korkaatiweello waagu lexxo gargarate biiro sai diro hanaffe qoqqowu layinki pirezidaantichinni massagantanno qoqqowunni kayisse woradu geeshsha giwirehaayle uurrissino; tini giwirehaayleno, seerimale daddalu milleessa, waagu lexxonna kuuso heedheenna waagu lexxo heedhannokki gede kaajjado qorqorsha assitannota ikkitino gede coy’rino.
Hawaasi Quchumi deerrinono quchumu gashshooti addi addi laalcho babbaxxino qarqarinni umisi fulonni hodhisiisenna addi addi fulubba dandee Geexaanote Mittimma Maamarrara shiqishasinni dagate waagu lexxo heedhannokki assasinni noota kule; konnirano quchumu gashshoote galatammora baxeemmo yiino Kalaa Baxiso.
Konne baala assinanni hee’nenni hasi’noonni deerrinni waagu lexxo ajisha dandaa hoongirono heeshshote oollenni daga mitii’mitannokkinna geino dikkote amanyooti hee’ranno gede qara qara ikkinori xa noowiinni waaga lexxe dada mitiinsannokki gede kaajjine loonsanni hee’noommo; korkaataammo ikkinokki kaiminni waaga leddanno daddalaano aana qaafo adha hananfoommo; tini qaafono kaajje sufanno yiino.
Kayinnilla daganke qara gede jifantanni noohu faafiriku laalchubbanniiti. Konnihuno qaru korkaati faafiriku laalchubba batinyunni gobbaydi gobbuwanni daggannonna Doolaarete soorro hasidhannore ikkansa tittirshunni kaysinohu biirote layinki sooreessinna daddalu handaari sooreessi Kalaa Baxiso, konne laalcho hasi’noonni deerrinni eessinannikki gede gobbate gede xaaddinonke Doolaarete anje qole baalunku huwanteemmote yiino.
Kalaa Baxiso, mootimma kuri qarrubba aante noo garinni tirate gobbanni dagganno laalchubba gobbate giddo faafirikkanni riqiwate loossanni noota xawise; dagate heeshshote oolle kalaqatenni daga aana xiiwo iillishshanni noo qarrubba taashshateno mootimma mudhaanchimmatenni loossanni afantannota coy’rino.
Dagano hiitte yannarano korkaatiweello waagu lexxonna seerimale milleessa la’uro huutaabbukkinni qarqaraho afantanno hajo la’annonsa mootimmate uurrinshubbara qummeessa aa hasiissannota duure huwachishino.
Jeefoteno, Gogunna Landunni afi’nanni gobbaydi soorro hedote giddo woratenni ayyaanu yannara gorrinanni saada Goginna Landi daddadhamikkinninna danimalikki qorophotenni gorra hasiissanno yee; xaphoomu kiristinnu ama’no harunsaanorano noosita dancha halchosi xawisino.
Addisu Adoola
Bakkalcho Dotteessa 13 , 2014 M.D
