Sidaamu daga diru soorro fichee cambalaallate ayyaani amanyootenna amadosi agadhino garinni mine minenko ayirrisate qixxaamboonnita sidaamu qoqqowi Woga, Turizimetenna Ispoortete biiro sooreessi kalaa Jaggo Agenyewuhu egensiisi.
Kalaa Jaggo baxxinohunni Bakkalcho gaazeexira xawisino garinni; koroonu vayiresenni agaramate sai diro mine minenko ayirrinse sa’noonnita kayise; vayiresete horro nirinni lexxasenni tayixe dirono ko garinni mine minenko ayirrinsannita xawisino.
Konnira sa’u lamala giddo budu geerri fulte hasaabbe amanyootu fajjanno garinni hattono koroonu xissonni qorophine ayirrinsanni gede gumultinota qummi asse; teyixeha diru soorro ayyaana ayirrisate qixxaawono ficheete hornyo lainohunni Dokmenteretenni, Paanaalete hasaawinninna addi addi loosinni hananfoonnita coyi’rino.
Ko garinni albiidinke Arbe yaano Dotteessa 29/2013 M.Dnni fiixaari hawarro amanyootu fajjanno garinninna qorophote shiima kiiro noo manninni keeraanchimma agadhatenna koroonu xissono gargadhate doogimaroho mannimmate gunte millimmo assatenni battalate qixxaawonni harinsannita coyi’rinohu biirote sooreessi ; barraho fiixaari hawarro baalante qoqqowu biiroranna woraddatenna quchumu gashshoottara labbanno yannanni ayirrinsannita lede xawisino.
Konni alba gobbate togonni Fanxaaxaho/Maariyye/ yinanni dhibbi kalaqameenna ko garinni ayirrinsanni hedeweelcho xaadde sainota kayise, xaano tini gobbateno ikko kalqete xaaddino horro ba’eenna keerunni xaande faajjete gudumaaleho fulle ayirrinseemmo barri daanno gede huuccatto assa hasiissannota qaagiissino.
Ledoteno kalaa Jaggo, ficheete ayyaani mootimmanniha calla ikkikkinni dagoomu mine minenko amuraatesi agadhino garinni ayirrisa rosa hasiissannota qaagiisse ; ko garinni amadosi agarre dagganno ilamara sayisate loosa hasiissanno yino.
Jeefoteno sooreessu ; hawalle Sidaamu daga diru soorro fichee cambalaallate ayyaanira baalanka keerunni iillishino’ne yee; tenne kalqete kalaqante daga gawajjitanni noo vayirese maganu badhera qolanno gede baalunku amma’nosinni huuccatto assa, fayyatenni qorophanna mine minenko garunni ayirrisa hasiissannota coyo’rino. Diru keerunniha, hurrenniha baxillunnihanna mittimmanniha ikkanno gede halchosi xawisino.
Qiddist Gezaheny
