Hawaasa፡- Hawaasi quchumira baattote amadooshshinna shiqisho gashshsoote woyeessinoonnita xawinsi.
Hawaasi quchumi aantaanchu kantiiwinna quchumu latishshinna konistirakiishinete biddishshi sooreessi kalaa Milkiyaasi Bitirehu xawisino garinni quchumaho shiimanna gutu jiro ikkitinota baatto garunni gashshinanni hasiissanno horora hossanno gede assinanni hee’noonnita coyi’rino. Quchumaho baattote gashshsootinna shiqisho woyyaawasenni baattote hasattono lexxitanni daggino. Lexxitanni dagginota baattote hasatto kaima assatennino quchumu gashshooti biddissuwate garinni baattote shiqisho gashshooti loossa gumullanni hee’noonnita egensiisino.
Quchumaho keeraancho ikkinohu baattote gashshooti hee’rasirano quchumaho hananfoonni kaadaastere xawishsha ikkitanno yinohu aantaanchu kantiiwi; quchummate baattote maareekkonna baattote ledo amadantino jajjuwa haaro hayyonni maareekkine amada hasiissannotanna kaajjinshe sufisa hasiissanno loossa ikkitinota coyi’rino.
Baattote amadooshshe woyyeessate quchummate hananfooni kaadaastere Hawaasi quchumira onte sinu quchummara loosu aana hosiinsoonnitanna gara wolootu quchummano dancha lawishsha adhitanni keeshshitinoha ikkanna xaa yannarano woloota lame sinu quchumma ledatenni kaadaasterete loosi sufinsoonni yino.
Albaanni noohu baatto tekinoloojetenni maareekkine amadate amanyooti woy kaadaastere loosu aana hosiinsoonniri ontunku Mennaheriyu, Mehaali, Bahil addaraashi, Taaboorinna Misraaqi sinu quchumma ikkitanna; xaa yannara Hayiqi daarinna haaru sinu quchuminni ledo shiima jiro ikkitinota quchumu baatto haro hayyonni maareekkate amanyooti widira eessatenna horonsi’rate loossa gumullanni hee’noonnita huwachishino.
Kaadaasterete loosi umihunni qooso kalaqannoha quchumu baatto gashshootinna latishshinni dagganno tajubbanna baattote ayidde ikkitino bissa shiqishshanno taje xaadinse buuxate. Buunxoonni tajubbano garunni tantanne garunni amandanni. Konni garinni loonsanna baattote taje ledo amadaminohunni ka’’anno koffeenyi dino. Baattote gashshooti amanyooti garunni massagamanna loosu aana hosa dandaanno yinohu kalaa Milkiyaasi; tekinolooje quchumaho noo baatto afatenna garunni horonsi’ra dandiissannoha ikkasira aleenni quchumu afi’ra hasiissanno eo mageeshshitero bande afateno kaa’lanno yino. Wole ragaannino seeri-male doogonni baatto horrantannokki gargara dandiissannotano hattonno.
Quchumaho kaadaasterete amanyoote harunsine baatto haaro hayyonni amadatenni sae liizete lallawi garinni baatto lamu garinni woleho sayinsanniha ikkanna baxxinohunni loosu kaayyo kalaqatenni quchumaho jawa horo abbitannori investimentete handaarranni loosu giddora e’ino dureeyyera ikkinotano qummi assino.
Baatto dureeyyete sayinsanniri lame doogga gobbaanni maamarunni tantanante daggannori hasattonna wolqa noonsa teessaanora hee’nanni mine mi’nate dandiitanno bayicho qixxeessatenni shiqinshannitano xawinsoonni. Konni ledono quchumu giwirinnira, manufaakcheringete, industiretenna lowo fulo nookkiri quchumu gashshooti minsiisannori gutunni hee’nanni minnarano hattonni biddissuwate garinni baatto qixxeessinannita kule; amandoonnihu baajeettete dirinnino sa’u hones agannara quchumu gashshooti baatto mixote aleenni qixeesse hasidhannorira sayisinota qummi assino.
Hawaasi quchumira baattote shiqishonna gashshooti woyyaawanni dayinotanna quchumaho 40 kumi ale ikkitannoti shiimmaadda baatto noota lede xawisinohu kalaa Milkiyaasi; xaa geeshsha kaadaasterete amanyootira eessinoonniti 8 kume ikitannota calla ikkanna quchumu gashshooti jawu loosi agarannositanno coyi’rino.
Amsaalu Felleqe
Dotteessa 21, 2013 M.D Hamuse
