Hawaasa:- Tayixehu Mootichinke Iyyesuusi Kiristoosi kaote ayyaana korkaata assatenni quchumaho korkaati-weelo waagu lexxonna allaggichore sagalete giddo karsine dikkote shiqinshannikki gede kaajjado qorqorsha assinanni hee’noonnita Hawaasi quchumi daddalunna dikkote latishshi biddishshi sooreessi kalaa Hayilu Yetterihu egensiisi.
Biddishshu sooreessi kalaa Hayilu Yetterihu uyino xawishshinni xaa yannara gobbankera afantanno quchummara daddalunna dikkuwate amanyooti ledo amadaminohunni korkaati-weello waagu lexxo nooha ikkanna Hawaasi quchumi garinnino la’niro sa’u dirranni heewinsiro luphi yitinoti baxxinohunni zayitete, qamadete bullee aana hattono mereerimi garinni waagu lexxo kalaqantinohu faafriku uduunni paastu, mokoroonenna saamunnate aana waagu lexxo noota bandoonni.
Konneno badate dandiinoonnihu geexaano uyitino qummeessinninna biddishshu ogeeyyeno haruunsonna xiinxallo assitanno gede assineenna ikkinota kulinohu sooreessu zayitetyenna qamadete bullee waagi lexxo luphi yitinohu ontu aganira albaanni mootimma diggomunni shiqishshanni keeshshitinoha uurrissu yannanni aana waagu lexxo kalaqantinota qummi asse daddalaano diggomu gobbaanni uminsanni abbite waaga leddanni hirtanni noo gede iillinoonni yino.
Biddishshunnihu qaru loosino daddalaano hidhitino uduunne abbite maaxxe anje kalaqantanno gede assatenni korkaati-weelo waaga luphi assite leddanni geexaano caacceessitannokki gede geexaanote agarooshshi lallawi garinni gargarate yinohu kalaa Hayilu; quchumu deerrinnino giwre-hayle uurrinse qorqorsha assinanni hee’noonnita kulino.
Xaa geeshsha assinoonni qorqorshinnino sukkaarenna zayte mininsa giddo maaxxe afantinori 4 daddalaano fajjo hunnoonnitanna wolootuno 118 daddalaanora kaajjado qorophishsha uyinoonnita kulino. Settunku sinu quchummara assinoonni qorqorshinni baxxinohunni sase quchummara seeru gobbaanni ikkino garinni duunnoonniha 5 litire zayte 248 jerikaane, sukkaare 66 kuntaala woranseenna mootimma fushshitino waaginni dagoomaho shiqinshoonnita huwachishino.
Tayixehu Mootichinke Iyyesuusi Kiristoosi kaote ayyaani ledo amadaminohunni daddalaano seeru gobbaanni ikkino garinni korkaati-weelo waagu lexxo kalaqqannokkinna dagoomu fayyimma gawajjanno garinni baxxinohunni barbarete, buuroho, zayitete hattono daammu minnara, daabbonna buddeena gannanni minnara saga’linanni uduunnira allaggicho ikkinore karsiisse dikkote shiqishshannokki gede hedeweelcho qorqorsha assinanni hee’noonnita sooreessu uyino xawishshinni huwatate dandiinoonni.
Abbebech Maatiwoos
Dotteessa 21, 2013 M.D Hamuse
