Addis Ababa:- Halantino mootimma uurrinsha ga’labbote amaale mini tenne yannara Tigrayete qoqqowi hajo lainohunni fushshino xawishshi kalqe Itophiyu halaale huwattanni daginota leellishannoha ikkasi IFDR Gobbaydi hajo ministere qaalu sayisaanchi Ambaasaadderichu Diina Muftihu egensiisi.
Ambaadder Diina Muftihu yannate hajo lainohunni uyno xawishshinni egensiisino garinni; Aliyye Itophiyi hajo lainohunni halantino mootimma uurrinsha ga’labbote amaale mini tenne lamalara albinni baxxino xawishsha fushshino.
Xawishshuno konni albaanni uynanni keeshshinoonniti gobbate macca huntanno hedo baala gara ikkitinokkita leellishinoho. Kalqeno Itophiyu halaali hiikko nooro huwattanni dagginota leellishannoha ikkasi kulino.
Amaalete mini xawishshisinni Itophiyu mootimma Tigrayete qooxeessira shiqishshanni noohu mannoomittete kaa’lora afansha uyinoha ikkasi kulinohu Ambaasaadderi Diina; xawishshu Itophiyu mootimma Aliyyee qooxeessira mittoreno dikaa’litino yinanniha Galchimi kalqe gobbuwa hedo baalanta gara ikkitinokkita huwachishinoho.
Xawishshu Itophiyu ayirrinye agarsiisino garinni gutunni raga worrarra hasiisanno yaanno hedo filiqqisino. Itophiyu ayirrinye agarsiisinohanna baatto kaxxino halaali nootano leellishinoha ikkasi Itophiyu mootimma huwattanno yino.
Itophiyu mootimma konni albaanni kultanni keeshshsitino huuro xa ga’labbote amaale mininni afansha afi’reenna xawishsha uyinoonnita qummi assinohu Ambaasaadderi Diina; baxxinohunni mite mite gobbuwanna uurrinshuwa Itophiyu daafira fincitinoti so’ro ikkitino mashalaqqe gara ikkitinokkitanna halaalu ninkeha ikkinota leellishinoha ikkasi coyi’rino.
Amaalete mini xawishshi kaa’lote uurrinshuwa mannoomitte qooso agarino garinni assitanno kaa’lo kaajjishshe sufissara sokka sayinsoonniha ikkasinni Itophiyu mootimma hedo ikisannoha ikkasino egensiisino.
Itophiyu mannimmate qooso komishiine Haaroo’mate kofatto, mootimma Tigrayete qoqqowira loossanni noore, Sudaanete danni ledo noorena hajubbanna woloota ajanduwa lainohunni Itophiyu aana iillinshanni xiiwo gargarate babbaxxitino gobbuwara afantanno Eembaasuwa millimillo assitanni nootano xawisino.
Itophiyu aana haaroo’mate kofatto lainohunnino ikko qasiisotenni xaandanni gobbuwa hajubba hattono Tigrayete qooxeessi yannate hajo lainohunni nooha kalqoomu xiiwo ajishate assinanni wo’naalshino kaajje sufinota qummi assino.
Ambaasaadder Diina xawishshi garinni; sa’u lamalara IFDR miseessu xaphoomu ministerichinna Gobbayidi hajo ministerichi kalaa Demmeqe Mekonninihu Ruusiyu- Afriku halamme foreme qaru borreessaanchi ledo hasaawino. Hasaawu yannarano Itophiyu layinkihu foremete gambooshshira leellite beeqqate hasatto nooseta kalaa Demmeqe xawise lamente gobbuwa xaadooshshe roorenkanni kaajjishate dandiissanno hasaawa assino. Ruusiya calla ikkikkinni Veetinaami ledo gobbanke noose xaadooshshe kaajjisha dandiinanni hajubba lainohunnino hasaabbino.
Dotteessa 21, 2013 M.D Hamuse
Amsaalu Felleqe
