Abrahaam Saamueel
Woldiya: Cancishaamo gaamo ontu aganira Woldiyahonna qooxeessaho keeshshitu yannara amma`note minna masgiiddanna huuccattote minna sagale loonsannihanna kaampe assidhe keeshshitinota Aliidi Wollote Zoone Isiliminnu Hajo Borreessaanchi Hajji Aligaazi Asiressihu coy`rino.
Hajji Aligaazi basete noo Itophiyu Pireesete uurrinsha odeessaanora uyno hedo garinni, gaamo jajjahonna manchi beettira calla ikkikkinni amma`note minnano xursiissenna batteessite olantote kaampenna sagale loosidhanni boosaallo assidhe keeshshitino.
Hajji Aligaazi xawisinte gede, amma`note base ayirradote. Masgiidu ayirradoho. Huuccattote minna ayirradote. Insa kayinni ayirrinye affinokki daafira ayirrado ayirrisate didanditino.
Konniraati, masgiiddanna huuccattote uurrinshuwa huntannohu; Kitaaweno giirtinohu. “Ay wooyteno ammanaano basensa diagurtannona tini wolquwa daggu wooyte ninkeno minenke hee`noommo; e`u wooyte mannaho yinoommo. Ikkollana, Manchu beeti gedeere ikkitinokkire la`noommo” yiinohu Hajji Aligaazi, insa e`u wooyte iillitinonke gawajjo shota di-ikkitino. Assootensa la`nummoro afuunni xawisate ayirranno. Mannahonso gotoho? Ay ledo taashsheemmoro diafoommo” yaanni xawisino.
Keeshshitu yannara uduunnu digatino; uurrinshubbanna hallanyu uduunni geeshsha horritino. Doogo ha`ranno manchiwiinni xibbenna ontawo birra kiisensanni gadadisse adhitannore Allahi leellishinoe. Lowo wedella usurte gawajjitino; lubbantino. Xaphoomunni ontu agani ninkera rakkote yannaati yiino.
Tini wolquwa xaphoomunni hadhanni noo gari gobba hunateeti; diigateeti. Kaaliiqi waajja heedhoommeensaro amma`note minna agartanno. Kuri togoore di-ikkitino. Amaa`note minna e`e iillishshino gawajjo, quchumaho assitino jaddo, qoleno minna e`anni manna gantanni utteessitino gari kaaliiqi gatona yaannonsakki cubbooti yaanni shigiggisanno TPLF assoote naqqasino.
Hajji Aligaazi coy`ranni, daga irkisatenna jawaachishate amma`note annuwi qeechi jawaho. Anino wolootu Isiliminnunna Ortodokisete amma`note massagaano ledo halamate kaa`lote looso loonsanni keeshshinoommo yiino. Konni garinni Abune Ermiyaas fulino qeechi jawa ikkinota xawisa baxeemmo. Korkaatuno, isi loosanninna irkisanni keeshshinohu Ortodokisete ammanaano calla di-ikkino. Musiliime, Pirotestaantete hattono baalante daga annaati. Kuni Phaaphaasichi daga baala taalo la”anno. Mittu widira dassikkinni tii”isi daafira sharrammanni umosi saayse aate qixxaawino annaati yaanni naqqasino.
Bakkalcho Sadaasa 21 / 2014
