Abrahaam Saamueel
Addis Ababa:- Itophiyu mootimma aana gobbaydi miidiyinna tuqu xaadooshshi mootimmanni “Tigirayete daga sircho hunate jaddo Itophiyu loosino” yite shiqishshino kisse Kalqete Dagoomi Mannihimmate Qoosso Komishiinenna Itophiyu Mannihimmate Qoosso Komishiine ledo assitino buuxonni kisse kaphoho yitino.
Cancishaanote gaamonninna HWHT irkisaano ikkitinoriwinni Galchimi Mootimmanna Uurrinsha hattono Tuqu xaadooshshi Cancishaano gaammowinni calla adhitanno kaphu mashalaqqenna taje Itophiyu mootimma sircho hunate jaddo loossino yitanni keeshshiturono ripoorte xawissannohu mittu kaimi nookki kapho ikkinota buuxisino.
Mitteenni halamatenni loonsoonni xiinxallonna buuxo Itophiyu Mannihimmate Qoosso komishiinenna Halantino Mootimma Mannihimmate Qoosso Komishiine Aliidi komishiinere ledo buusamatenniiti.
Ledoteno, Itophiyu mootimma duucha yannara kassansanni keeshshinoonni meento siyaatanna hude ola qeelate uduunne assi`ne horoonsi`rate kisseno ripoortete aana kaphoho yinoonni.
Roorenkanni ripoorte, “Tigirayete baxxitino wolqanna Milishu’’ yaanni xawisinnori Cancishaanchu gaamonna qodhaasine, seeru allaalshi hundaanni ikkitinori gargartote olanto miilla hattono wolootta keeraano daga gosa kaima assite jawa jaddo iillishinota buuxisino.
Kalqete Dagoomi ripoorte, techo geeshsha xawinsoonnikkita Cancishaanchu gaamo hunote loosonna mootumma shiqishshanno taje reqecci asse leellishannohonna ammanooshshe luphi assitannota ikkitinota kultanno.
Xiinxallote gumi riippoorte macciishshinohu IFDR Xaphoomu Ministirichi Dr Abiy Ahimedihu, Itophiyu Mannihimmate Qoosso Komishiinenna Halantino Mootimma Mannihimmate Qoosso Aliidi komishiinere loossino xiinxallote guma gatinori hee`rirono adhannota xawisino.
Lamenti Mannihimmate Komishiine fushshitino xiinxallote riipoorte aana xawishsha uyinohu Xaphoomu Minstirichi; mitteenni halante loossino xiinxallote riipoorte garinni Itophiyu mootmma Tigirayete mootimma aana sircho hunate jaddo loossinokkita buuxisiisansa danchu garinni huwatinota kulino.
Shiqqino ripoorte Itophiyu mootimma hudenna meentu aana siyaata olu urde gede assite horoonsidhinokkita buuxisiisinoha ikkirono, diininke techono ninke kaphunni kassasanni nootanna fooliishsho nookkiha su`manke hunanni no yiino.
Fultino riipoorte aana mootimma Tigirayete dagara sagalete kaa`lo iillitannokki gede assitino yitanno kisseno kapho ikkkase kultinota xawisino.
Mootimma, riipoorte keeshshitino yannanna iillado assinoonni baychi garinni qoleno mite mite ninkeno sumuu yineemmokki gumulonna hajo heedhurono, lamenti uurrinsha jifonna qarru bati`re noonke yanna giddo heedhe Cancishaanchu gaamota halaalanya hunonna barshe misiletenni leellishate assitino wo`naalshi jawaata ikkinota Xaphoomu Ministirichi egensiisino.
Xaphoomu Ministirichi, lamenti komishiine halante lossino buuxonna xiinxallote riiporte Itophiyu mootimma aana fannoonnita kaimu nookki kissenna su`ma hunate loosi no yite shiqishinoti gama kisse wodana`ya koffi assiturono, assinoonni buuxo guuta nafa ikka hoogguro riipoorte gara ikkitino daafira adhineemmo yiino.
Shiqqino riipoorte aana sumuu yineemmokki hajo nooha ikkirono, tenne yannara jaddo iillitanni noo daga gatisate, jaddaasine xa`mantanno gede assatenna gargarate adhinanni qaafo irkisannota ikkitinohura adhineemmo yiino.
Konni oli aana keeraano manni qosso kisantinotinna addintanni gawajantinoti wodana kissannota ikkitinota Dr Abiy coy`rino.
Bakkalcho Birra 25, 2014 M.D
