Amsaalu Felleqe
Hawaasa:- Qoqqowohonna qooxeessaho xaa yannara barru barrunni lexxitanni dagginoti waagu lexxo dagooma jawu garinni caacceessitanni afantannota Sidaamu dagoomu qoqqowi amaale mini miilla coyidhu.
Sidaamu dagoomu qoqqowi amaale mini 5kki doyicho umikki loosu diri 2kki uurrinshu songo Hawaasa Miliiniyeemete harira harinsi yannara amaalete mini miilla coyidhino garinni xaa yannara quchummate ikko baadiyyete qooxeessuwara korkaatiweelo ikkinohu sagalete ikko wolootu uduunni waagu lexxo kaiminni daga lowontanni caaccaabbanni afantanno yitino.
Tenne hajo amande Hawaasi quchumira towaanyo assine hasaawinsoommo teessaano mereerinni mitu mitu Bakkalcho gaazeexira uyitino hedonni baxxinohunni quchummate qooxeessuwara sagalimmate horoonsi’nanninna wolootu uduunni, minu kiri, nadaaje waagi lexxino yaanno korkaatinni duuchurinni hodhishshu owaantera baatooshshu waagi lexxanna hidhateno heeshsho garunni massagateno lowontanni qarrammoomo yitino.
Konnirano jawu korkaati daddalaano hasiissannokki tirfe afi’rate korkaatiweelo waagu lexxo barru barrunni leddanna hasiissanno bissara koffeenyanke shiqishi’nummorono hajo xaa geeshsha dawaro afi’ra hoogasenni woyaawinori dayinokkita coyidhino. Tenne hajo lainohunni qoqqowu amaale mini miillano base basente leellanni noohu waagu lexxo daga caacceessitanna danchu gashshooti mitiimmano ikke leellinota xawissino.
Xaa yannara albaanni sa’u dirranni heewinsiro tayxe dirinni korkaatiweelo waagu lexxo lexxitanni dagginotanna konnirano yanna yannatenni hajo la’annonsa bissa ledo haruunsonna qorqorsha assinanni wodhote gobbaanni waaga leddannonna uduunnu anje kalaqantanno gede affanni heedhe lossanno daddalaano qorqorsha assinanni taashshate wo’naalloonnita dawaro qolloonniha ikkanna ikkollana xaano hasiisanno deerrinni daga tashshsi assano garinni waagu lexxo gatisa dandiinoonnikkita xawinsoonno.
Barru barrunni lexxitanni dagginoti waagu lexxo dagoomu heeshshosi garunni massagannoki gede korkaata ikkatenni wolu garinni kayinni danchu gashshooti qarra kalaqqanni noo daafira qoqqowunna federaaleteno hajo la’annonsa bissa ledo hasaanbanni qarrubba tirate wo’naallanni hee’noonnita xawinsoonni. Korkaati-weelo waagu lexxo goboomu deerrinnino dagooma lowontanni caacceessitanninna yaachishshanni afantanno hajo ikkitinotano kayinsoonniha ikkanna baalante dagoomu bissa aana taalo ikkino garinni tuncu yitino mitiimma tirate federaaletenna qoqqowohono hajo la’annonsa bissa ledo yanna yannatenni hasaanbanni qaafono adhinanni hee’noonnita kulloonni.
Baxxinohunni kayinni xaa yannara gobbankeraa ikko qoqqowu deerrinni dagate kiiro akkimale lexxitanni dagginota ikkasenni baalunku manni hasattonna shiqisho kayinni taala hoogasenni kalaqamanni noo qarraati yitinori hajo la’annonsa bissa; konnira kayinni dawaro ikkitara dandiitannoti daganke laalchinna laalchimma lexxitanno gede hixamanyine loosatenni daganke sagaletenni umonsa dandiitannonna buximatenni fultanno gede deerru deerrunkuu noo mootimma daga garunni massagganni loosa hasiissannotano duu’ne worroonni.
Bakkalchoo Dotteessa 14/ 2013
