Addis Ababa:-Itophiyaho Wocawaaro 24/2014 M.D sanfanni haaro Mangiste lexxanni daayino waagu lexxa aana babbaxxitino hayyonni taashshara agarrannita Hawaasi Quchumi teesaano coyidhu.
Kalaa daawiti Abaate Hawaasi quchumi teesaanchi xawisino garinni haaro safantanno mangiste Cancishaanchu HWHT ledo assinanni tii’’u ola harancho yanna giddo xaphi assatenni Olu ledo amadisiisame dayino shaqaxxatenna sagalete horonsi’nanni uduunni aana lexxino waaga ga’labbisate loosa hasiissannonsa yino.
Kalaqamino waagu lexxa roorenkanni shiqonna hasatto taala hoogatenni ikkinota xawisinohu kalaa daawiti;haaro safantanno Mootimma yannate geeshshira ikkado laalcho gobbayidinni eessatenni hattono sufino garinni laalchonna laalchimma lossatenni yanna yannatenni lexxanni dayino heeshshote sutama ga’labbisa hasiissannota qummeessino.
Kalaa daawiti Abaatehu yinonte gede;haaro safantanno mootimma Amaalete mine beeqqaancho assa hasiissanno. Fultanno wodhiworo miilla taashshitannonna hedo guwursitanno kaayyo kalaqantoommero safantanno mootimma adhamooshshe afidhanno. haaro mangiste kaabiine ikkadimma noonsarenna fullahaano hanqaffinota ikka hasiissanotano lede huwachishino. Konni albaanni HWHT massagganno mangiste assitannohu gede su’mira calla ikkikkinni annimmanna xa’mamooshshu ledo ikka hasiissannotano kalaa Daawiti huwachishino.
Wole Itophiyu Pireesete uurrinshara hedose uyitinoti hallanyu loosinni heeshshose massaggannoti beetto Gennet Beshah hawaasi quchumi teesaanchooti. Iseno haaro safantanno mootimma addi addi doorsha horonsi’ratenni heeshshote bikki ale ikkino waaga taashsha hasiissannota qummeessitino. Konni garinni buxichuno dureessuno taalo hee’ranno Itophiya kalaqa haaro mangiste wiinni agarrannite yitino.
Seerimale daddalaano no yitinoti beetto genneti;haaro safantanno mootimma togoore buuxatenna xinqatenni taashshinanni qaafo adha hasiissannotano ledatenni.
Wedellichu Naatinaeeli Abdihu Hawaasi quchumi teesaanchooti. Hawaasi Yuniverstera Injineriingete rosaanchooti. Isino mangiste seera agarsiisate gaado rahotenni gudde,wole widoonni heeshshote aana waaga ledatenni daddalu ola fantinoriwa alba higa hasiissanno yano. Xa gobbankera safantanno haaro mootimma loose loosiissannore,baqqi yite baqqi assitannore ikka hasiissannonsatano guwursino.
Diru dirunni Yuniversitubbatenni maassante fultanno wedelli kiiro jawa ikkase qaagiissinohu wedellichu Naatinaeeli;haaro safantanno mootimma addi addi pirojektubbanna safote latishshubbara wedella beeqqisiisate loosa hasiissannotano huwachishino.
Wolu hedosi uyinohu kalaa Melaaku molliho. Isino hedosi woranni haaro ሳፋነታነኖ mootimma dikko ga’labbi yita geeshsha qara qara goofannonna sagalete hosanna laalchi aana qaraxiweelo eessa hanafinota sufa hasiissanno yino.
Kalaa melaaku xawisino garinni olu gobba gatisate assinanni tiiu ola ikkasinni halamme gobbate diina Itophiyu haxonni dirrinse latishshaho alba hingo yiino.
Yaareed Geetaachew
Bakkalcho Wocawaaro 6, 2014 M.D Hamuse
