Cancishaanchu HWHT sa’u 27 dirrara gobbanna dagate aana shetto ganatenni; gaamotenni tantanante gobbatenna dagate miinja mulqatenninna wolootta gobbuwara xooqisidhanni keeshshitinote. Gaamo biilloonyu yannansa seedisi’rateno daga mimmitu ledo sumuu yitannokki assatenninna gaance kalaqqanni sa’ino. Manchi beetto sircho baddanni shite guddanno gaamono tantante qajeelsatenni keeraano qansoota raafatunni shitanni heedhino.
Gobbate gargartote olantono hedeweelcho badheenni higge qasatenni kaadaanchimmansa leellishshino. Xaa yannarano keeraano qansoota calla ikkikkinni danqa saadano shitanni, jajjanna dagoomittenna miinju owaante uyitanno uurrinshuwa diigganninna giirte huntanni afantanno.
Kuri cancishaano gaamo assootinni hanqitino dagano gobbankera wo’munku qooxeessinni mittimmatenni ka’’atenninna gargartote olantora irkonna hale ikkate aleenni wedelluno timbiliqqi yite worbimmatenni gobbansa diinunni gatisate gargartote olanto karsantanni afantanno. Tenne lamalarano Xollay qajeelshu mereershira qajeelte maassantinorino gobba diinunni gatisate illacha amaddinori gargarooshshu olanto bisooti.
Xollayi safote qaleeshi mereershira olamaanchimmate qajeelsha adhitinori maassantu yannara ayirrado barru wosincho ikke ba’rete leellinohu gargarooshshu mittimma mannu jiro qara biddishshu sooreessi Meejer Jeneraal Hacaalu Shellemahu coyi’rino garinni; assinoonnita gobboomitte woshshatto maahoyye yite adhite qansichimmate gadachonke fulleemmo yite gobbansa ayirrinyinna hegeraamimmara lubbote waaga baatate qixxaabbino wedelli Itophiya xaaddinose jifonni fushshate sharrantannori janna oososeeti yino.
Luphiima wole ba’latto afidhannori rosi mini qaru hajajaanchi Birigaadeer Jeneraal Xumsiido Fiittamohu isi widoonni; Itophiya gatisate gaandeemmo yaatenni wo’munku gobbanke qooxeessinni bobbakke gamba yitino wedelli rosu mini worino rosu amanyooti garinni wo’ma qajeelsha adhitino.
Qajeelshunnino olamaanchimmate ikkadimma; hattono yannaasincho olamaanchimmate hayyono qajeeltinoha ikkanna diilallote olantonna injineringe e’annorirano shota olu uduunne tokkonsanni gara, hayyonna labbannore hasiisannoha safote qajeelsha adhitanno gede assinoonnitano xawisino. Amanyootu ragaannino gobboomitte worbimmanna dagate baxilli hee’rannonsa
Amsaalu Felleqe
Bakkalcho Wocawaaro 6, 2014 M.D Hamuse
