Cancishaanchu HWHT qodhaano kakkachillu guunxonsa co’o mannimmate akatinni fultinore ikkansa laise “HWHT gedee kakkachuulli Itophiyu baattora kalaqamansa dhaggeeffachishannoho” yaatenni cancu gaamo iillishshino miico Gaayinti dargaho afame lainohu ilama Itophiyunnihu Kanaadu qansichi odeessaanchu Yaareedi Adimaasehu coyi’ri.
Kaameeru odeessaanchimma ogimmanni 18 diri ale gade noosita coyi’rannohu odeessaanchu Yaareedi; Kanaadunni kae ile gobbasi Itophiya daatenni cancishaanchu HWHT barshe kalqete dagoomira iillishate baxxino garinni Gayinti yinanni basera afame kalaqaminore baala la”asi Itophiyu Pireesete Uurrinshara xawisino.
Cancishaanchu barshe illesinni lainohu odeessaanchu; “togoo dani cubbaaleeyye halaale Itophiyu baattoraati kalaqantinohu? Yitanno xa’mo giddo’ya galtinoe yino.
Cancishaanchu HWHT barshe wodanisi giddo gattinositanna baatto loosidhe galtino mannootiti diigantino minnanna gawajjamino jajji misile illesi giddo noota coyi’rannohu odeessaanchu Yaareedi; iillitino barshe Itophiyu qansootaati yine yine woshshinanni mannootiwiinni cira agarrannikkita, kalaqamino coy shagaggi assannonna manchu beettinni loosamanno yine hendannikki assoote ikkinota coyi’rino.
Addisu Adoola
Bakkalcho Wocawaaro 6, 2014 M.D Hamuse
