Sau 30 dirrara ga’retenna amma’note babbadooshshe kalaqatenni uminsata biilloonyu yanna seedisi’rate kalaqqinota babbadooshshu hadho buqqinse hunnoommo yino Sidaamu Qoqqowi keerunna ga’labbote biiro sooreessi kalaa Alemaayyehu Ximootewosihu.
Kalaa Alemaayyehu Itophiyu pireesete uurrinshara xawisino garinni; cancishaano HWHT gobba gashshitino yannara Sidaamu qoqqowira heedhanno daga dagoominna amma’no mereero babbadooshshenna kipho kalaqatenni seeda dirrara mitteenni heedhino daga giwansiissanni keeshshitino.
Kalaa Alemaayyehu xawishshi garinni; cancishaano gaamo gobba massaggu yannara Sidaamu dagata bayi’riidi seeri fajjanno xa’mo ragunni dawarantenni dagate xa’mo dibbe aguratenna biilloonyu yannansa seedisi’rate daga dagate ledo kiphisiissanni keeshshitino; Sidaami qara kiphote mereersha ikkanno gedeno kaajjishshe loossino.
Cancishaano Sidaamunna wo’mante Itophiyu daga aana iillishshanno miiconna jifo deerra sa’’asenni biilloonyunni kayinseenna Meqele e’uhu gedensaanni Sidaama lede babbaxxitino qoqqowubbara kiphonna canco kalaqqanni keeshshitinota coyi’rinohu biirote sooreessi; baxxinohunni sau Sase dirra giddo cancishaano gaamo qineessitinno seerinna cancinni Hawaasi quchuma lede Sidaama babbaxxitino qarqartora batinyu qansooti darantinota kaysino.
Ledoteno Lamu diri albaanni kalaqamino adawu qarri gedensaanni qoqqowo alba noo keeru akatiwa qolate assinoonni sharronni xaa yannara qoqqowunnihu adawu akati albiwa higinota kule; konnirano dagate beeqqo luphiima ikkase xawisino.
Qoqqowu giddo hee’rannohu hiikku qansichino taalo qoosso heedhannosi gede assate dandiinoommo yinohu kalaa Alemaayehu; ‘’qooxeessu hajubbanni fulle Itophiyimma gotti assite leellishshanno hajubba aana loonsoommo’’ yino. Qoqqowu giddo ga’reteno ikko amma’note babbadooshshi nookkita amadisiise coyi’rinohu sooreessu; Sidaamu qoqqowi xaa yannara qooxeessu laooshshinni fule Itophiyimma lattino keeru qoqqowo ikkinota xawisino.
Hawaasi quchumi gobbaanni qoqqowoho woloota qarqartorano baxxinohunni qoqqowoho dannu qooxeessubbara kalaqantino ga’labbo qoqqowu teesaano qoqqowu keerunna ga’labbote biiro ledo halante loosansa gumaati yinohu kalaa Alemaayyehu; qachu qoqqowubbara afantanno dannunni xaaddano quchummanna qoqqowubba ledo qinaambe loosanke jawa kaa’lo assitino yino.
Kalaa Alemaayyehu ledotenni; Sidaamu qoqqowiranna qooxeessaho xaa yannara daramino qansichi nookkita kule; konnirano qoqqowu qachu qoqqowubba ikkitino Oromiyunna Wodiidi qoqqowubba ga’labbote bissa ledo qinaawe loosasi mittuno daramino qansichi hee’rannokki gede jawa kaa’lo assitinota buuxisino.
Qiddist Gezaheny
Bakkalcho Wocawaaro 6, 2014 M.D Hamuse
